Brenda në pistën e aeroportit të Rinasit, aty ka ndodhur grabitja e rreth 2 milion eurove të një banke të nivelit të dytë. Lajmet deri tani janë kontradiktore, në mungesë të raportimit të saktë nga policia. Versioni i parë është se paratë po dërgoheshin me avion nga Rinasi jashtë vendit ndërsa tjetri, paratë sapo kishin ardhur nga jashtë dhe do të dërgoheshin në një degë të BKT-së. Edhe për shumën e parave, nuk ka një informacion zyrtar, por përflitet shuma e cituar më sipër. Ndërkohë, lidhur me ngjarjen ka zhvillime të reja.
Uniformat blu kanë gjetur duke u djegur një makinë në vendin e quajtur Shkalla e Tujanit në rrugën e Dajtit. Dyshohet se mjeti është përdorur nga autorët, të cilët pasi i kanë vënë flakën, janë larguar me një mjet tjetër. Ndërsa thuhet se ka patur shkëmbim zjarri mes Policisë së Shtetit dhe grabitësve, ku ka mbetur i vdekur një nga autorët, flitet edhe për një tjetër viktimë e cila është gjetur lumit Tërkuzë, rreth 10 km nga Rinasi. Dyshohet se viktima ka lidhje me grabitjen e ndodhur sot rreth orës 15:00 në aeroportin e Rinasit. Më poshtë, edhe njoftimi paraprak i Policisë së Shtetit
Pak minuta më parë, pranë aeroportit ndërkombëtar “Nënë Tereza”, në Rinas, dyshohet se disa persona ende të paidentifikuar, me maska dhe armë pasi kanë thyer derën e rrethimit që përdoret nga shërbimet zjarrfikëse, kanë grabitur një sasi lekësh në pistën e avionit dhe janë larguar.
Në ndjekje të tyre janë vënë forcat e FNSH dhe ato të Policisë Kufitare të Rinasit.
Gjatë ndjekjes në një rrugë dytësore, autorët kanë shkëmbyer zjarr me Policinë, e gjatë këtij shkëmbimi ka humbur jetën njëri prej autorëve të grabitjes. Policia ka gjetur ndërkohë dhe bllokuar një mjet fugon.
Forca speciale policore si RENEA e FNSH, të ndihmuara nga një helikopter janë ende në ndjekje të autorëve të grabitjes.
Të angazhuara në operacionin e gjerë janë edhe forca nga Policia e Tiranës, Lezhës, Dibrës e Durrësit.
Vendi ku është gjetur makina e braktisur
