Shtetasi Safet Bajri, ka depozituar një kallëzim në Prokurorinë e Posaçme (SPAK), ku kërkon hetimin dhe arrestimin e personave që, sipas tij, kanë keqpërdorur emrin e tij për qëllime kriminale, duke i cenuar reputacionin dhe ndikuar në jetën e tij personale.
Kallëzimi është dorëzuar nga avokati i tij, Sokol Tahiraj, dhe vjen pas një kontrolli të kryer pak javë më parë në banesën e tij nga prokuroria e posaçme. Bajri, i cili ka qenë gjithnjë në qendër të vëmendjes për aktivitetet e tij, kërkon që drejtësia të merret me ata që kanë përdorur emrin e tij në mënyrë të paligjshme dhe që kanë dëmtuar imazhin e tij publik.
