Shënim i ShkodraWeb
Ismet Drishtin e njohim prej shume e shumë vitesh. Kemi punuar bashkë edhe në mediat e Shkodrës. Dha kontribut në pozicionin e regjisorit dhe në hapësirat modeste të tregut mediatik në Shkodër, krijoi. Sot e patëm të vështirë ta marrim në telefon. Kemi komunikuar, por nuk e imagjinonim se do na duhej ta merrnim në telefon pasi ishte dhunuar personalisht. Para disa kohëve media e veçantë e krijuar prej tij “Zjarr TV” ishte pre e një sulmi hajdutërie, por nuk e telefonuam. Menduam se do të ishte ndonjë sulm me qëllim përfitimin përmes vjedhje- shitjes se aparaturave.
Sot e morëm në telefon. Jo pa shqetesim. Jo aq shumë për Ismetin si individ, por për familjen e të afërmit. Në profesionin tonë, e kemi bërë provë të gjithë trysninë e kërcënimit dhe pesha më e rëndë është për familjen e sidomos fëmijët. Ismeti me një zë të qetë dhe thuajse i pandikuar fare nga ajo që ka ndodhur. “I mora përpara” na tha. Normalisht, nuk dinim çfarë ti thonim. “Qoftë hera e fundit” na erdhi si shprehje. E fundit, në kuptimin e shenjëstrimit nga dikush/disa.
Më herët na tërhoqi vëmendjen deklarata e policisë për ngjarjen. Ishte shpallur në kërkim një person, i konsideruar si adoleshent. Ai kishte sulmuar Ismetin. Nuk vonuan dhe dolen pamjet e në fakt, nuk ishte një, por një grup individësh, të cilet nga ato pamje nuk dalloheshin nëse ishin adoleshentë apo të rritur. Pse jo, edhe në moshë pensioni.
Nga eksperienca, e kuptojmë policinë. Ngjarje të tilla, ku nën goditje është media dhe përfaqësuesit e saj, ka tendencë minimizimi të asaj çfarë ka ndodhur. Nuk duam të mendojmë se këtë përcaktim policia e ka bërë me urdhër. Por po ashtu, nuk duam ta besojmë se dy rastësi tek i njëjti person- media ndodhin brenda një kohe kaq të shkurtër. Pa dashur të abuzohet, humori i Ismet Drishtit dhe krijesës së tij mediatike, ka goditur pushtetin, direkt Edi Ramën. Mos e dhëntë Zoti të mendojmë se Ismeti dhe “Zjarr TV” janë sulmuar me urdhër apo me orientim nga lart. Por sërish nga eksperienca, nuk mungojnë individë që me “iniciativë” ndërmarrin akte ndaj “kundërshtarëve” të të adhuruarëve politikë. Ka ndodhur edhe në Shkodër, edhe neve personalisht deri në nivelin e kërcënimit. Pra, pa ja kërkuar askush direkt, por me frymëzim dikush mund të ketë vepruar…
Në fakt, ndokush mund të priste që Ismet Drishtit ta sulmonin terroristët, apo edhe vetë Al Baghadadi… Dikush mund të priste ta dhunonte personalisht ministri i Brendshëm…ose të paktën, Drejtori i Përgjithshëm i Policisë së Shtetit. Fatmirësisht nuk ndodhi asnjëra. Policia thotë se ishin adoleshentë… Le të ngushllohemi! Qoftë hera e fundit për ty Ismet Drishti! Sepse për ne të tjerët do të dëgjojmë sërish…
