Dita e fundit e gushtit të vitit 1997, ishte edhe e fundit në këtë botë për Lady Diana-s. Princesha e Uellsit, nëna e princërve trashigimtarë të fronit të Anglisë dhe ish- bashkëshortja e princit Çarls, humbi jetën në një aksident në Paris, në makinën në të cilën udhëtonte me Dodi al Fayed, miku dhe i dashuri i saj. Në përplasjen fatale në tunelin në rrugën Pont de l’Alma, ndërroi jetë edhe shoferi i tyre Henri Paul. Ndryshe nga dy të tjerët që humbën jetën menjëherë, Diana ishte dërguar e gjallë në spitalin Pitié-Salpêtrière. Dy orë pas aksidentit në 4:00 të mëngjesit, mjekët njoftuan edhe fundin e jetës së saj.
Ikja e saj e papritur dhe e papranushme e nje figure jashtëzakonisht popullore mbretërore, solli deklarata nga figura të larta në mbarë botën. Funerali i saj në Westminster Abbey më 6 shtator 1997 tërhoqi rreth 3 milion njerëz në Londër. Ceremonia e fundit në nderim të Lady Diana-s u ndoq nga shumë media botërore televizive me një transmetim të drejtpërdrejt.
Fundi i Dianës u mbulua me mister. Dhjetra teori konspirative morën jetë dhe të gjitha dilnin në një përfundim- vràsjén. Edhe sot ende këto teori vazhdojnë. Libra dhe filma, komente e aludime, dokumentarë, kanë krijuar atë panoramë ndarjeje me Dianën, princeshën sharmante dhe gruan që bëri kaq shumë për bujarinë dhe humanizmin.