Kush ka punuar në Top Channel e di mirë se dita nuk mund të niste pa ritualin e ndalesës tek bari i Piramidës. Aty ishte gjithmonë Pirro, Landi, Irena ose Keti. E mira Keti, gjithmonë e qeshur dhe punëtore! Nga mëngjesi në mbrëmje, me dy turne. Mbaronte turnin e parë tek bari dhe niste turnin e dytë me promterin deri pas mesnate.
Keti sot në të gdhirë u nda nga jeta nga një ishemi që e rrëmbeu brenda 48 orëve dhe largimin e saj e mësova nga kolegët e vjetër të Topit në rrjetet sociale. Ishin trishtuar të gjithë, sepse të gjithë e donin. Buzëqeshja e saj, fjalët e ëmbla, sajditë e komplimentet, optimizmi që nuk e di nga i buronte ishin bashkëudhëtare të pandashme të punës sonë.
Portretin e ëmbël të Ketit e gjeta edhe në shkurt të 2022-it tek Bari i Topit, ku shkova për regjistrimin e emisionit Ëndërrtjerrësit e ku bëra këtë foto. Të qoftë dheu i lehtë Keti! Ishalla e gjen në qiell, parajsën që nuk e gjete në tokë! /Nga Beti NJUMA, publikuar në Facebook/
