Ndërsa situata në Partinë Demokratike duket mjaft e acaruar sidomos pas 8 janarit 2022, palët presin përgjigje ligjore nga Gjykata e Shkallës së Parë në Tiranë. Me 13 dhjetor 2021, Partia Demokratike zyrtare, ka depozituar dosjen e Kuvendit Kombëtar të 17 korrikut dhe ndryshimet përkatëse të tij në Statut dhe në struktura. Gjykatëse do të jetë Blerina Muça.
Dy ditë më pas, me 15 dhjetor 2021, Komisioni i Rithemelimit ka depozituar dosjen e Kuvendit Kombëtar të 11 dhjetorit, me ndryshimet e Statutit por edhe vendimet e tjera. Gjykatës do të jetë Agron Zhukri. Deri në këto momente, nuk ka informacione zyrtare nëse PD zyrtare ka depozituar dosjen e Kuvendit Kombëtar të 18 dhjetorit.
Ligji Nr. 8580, datë 17.2.2000 “Për partitë politike”, i ndryshuar, përcakton qartë afatet që duhet të respektojë Gjykata e Shkallës së Parë Tiranë për regjistrimin, ndryshimet apo fshirjet në regjistrimet e mëparshme. Neni 13 i këtij ligji, e përcakton qartë se “Regjistrimi i partisë politike bëhet brenda 30 ditëve nga data e paraqitjes së kërkesës për regjistrim dhe të dokumenteve të parashikuara në nenin 10 dhe 11 të këtij ligji. Në rastin kur dokumentet e partive politike nuk janë të rregullta, gjykata, brenda 20 ditëve e kthen kërkesën për të bërë plotësimet përkatëse.“. Neni 14 i këtij ligji, plotëson kuadrin e plotë të veprimit juridik teksa sqaron se “Dispozitat e këtij ligji për regjistrimin e partive politike janë njëlloj të vlefshme për ndryshimet dhe fshirjet në regjistrimet e mëparshme. Kërkesa për ndryshime në regjistrin e partive politike bëhet nga organi i partisë që ka në kompetencë përfaqësimin e saj ndaj të tretëve.“.
Deri tani, nuk ka informacion se gjykata ka kthyer ndonjërën kerkesë për plotësime, aq më shumë kur ka kaluar afati 20 ditor nga dorëzimi i kërkesave nga palët. Pra, sipas ligjit “Për partitë politike”, maksimumi deri me 13 janar, gjykata duhet të shprehet për dosjen e depozituar nga PD- ja zyrtare dhe brenda datës 15 janar, duhet të shprehet për kërkesën e Komisionit të Rithemelimit të PD- së. Nëse ndonjëra palë ka pakënaqësi për vendimet e mundshme, ekziston e drejta e ankimimit në Gjykatën e Apelit Tiranë, teorikisht edhe në Gjykatën e Lartë dhe atë Kushtetuese, nëse palët mendojnë se u janë cënuar të drejtat e liritë kushtetuese.
Shprehja me vendim nga gjykata, mund të shtensionojë disi situatën edhe në nivelin e bazës, edhe pse me shumë mundësi, do të ketë pakënaqësi nga pala që nuk do të legjitimohet nga gjykata. Nuk përjashtohet se gjykata, në këtë rast gjykatës (vetëm 1) të përcaktuar me short tashmë, të regjistrojnë edhe dy ndryshimet e paraqitura. E kjo, do ta përkeqësonte më shumë situatën në PD. Nuk përjashtohet që të rrëzohen edhe të dy kerkesat, duke lënë një amulli të plotë në Partinë Demokratike.
Mund të zgjidhet edhe “heshtja” apo mosrespektimi i afatit 30 ditor siç përcakton ligji, ndoshta me idenë e marrjes së kohës për të parë zhvillimet në PD. Në të gjitha rastet, ku vështirë që gjykata të gjykojë në themel këtë çeshtje, të paktën në shkallën e parë, përveç ligjit, do të ketë ndikim padiskutim edhe përceptimi i krijuar nga gjykatësit lidhur me çeshtjen. Pa dashur të aludojmë apo të paragjykojmë ndërhyrje “të padukshme” të cilat e kanë shoqëruar dhe e shoqërojnë vendimmarrjen në sistemin e drejtësisë. Madje, edhe të “drejtësisë së re”. /ShkodraWeb/
