Vllaznia luan nesër një ndeshje shumë të rëndësishme, siç është ajo me Kastriotin në transfertë. Skuadra shkodrane e ka mundur lehtësisht këtë ekip në fazën e parë në “Loro Boriçi”.
Megjithatë, nesër Vllaznia do të shkojë në Kamzë për të luajtur një ndeshje me krutanët vetëm për fitore. Kështu ka deklaruar trajneri i Vllaznisë, Thomas Brdariç, në konferencën për media, në prag të ndeshjes me Kastriotin.
Kjo përballje vjen në një moment delikat sa i takon së ardhmes së kuqebluve, pasi një fitore i mban ato në grupin e skuadrave të kreut, ndërkohë në rast humbje, situata vështirësohet në lidhje me pretendimet e kreut, por edhe të përfshirjes në Kupat e Europës.
Ajo që të bën përshtypje është optimizmi dhe besimi që ka trajneri Thomas Brdariç në marrjen e një fitoreje në këtë ndeshje, gjë të cilën e shprehu edhe në konferencen e shtypit të dhënë përpara sfides, Kastrioti-Vllaznia.
“Ne përpiqemi për çdo ndeshje njëlloj. Nesër kemi ndeshjen ndaj Kastriotit, do e marrim seriozisht. Gjithçka është e rëndësishme nesër, nuk është vetëm se ne po mendojmë për rezultatin, por kemi punuar shumë këto ditë në stërvitje. Nesër është i rëndësishëm çdo dyluftim, çdo top i fituar dhe duhen fituar këto që të bëhet puna mirë.
Çdo ndeshje është e rëndësishme, dhe për këtë arsye duhet të marrim maksimumin dhe vlerësuar maksimalisht çdo ndeshje. Për ne çdo ndeshje është finale dhe e mendojmë shumë mirë, pasi edhe për Kastriotin është e njëjta gjë, një situatë e tillë dhe ne duhet të përpiqemi të marrim gjithmonë maksimumin, kur futemi në fushën e lojës.
Për nesër na është rikthyer Adili, e kemi të gatshëm dhe nesër normalisht pritet që të aktivizojmë formacionin më të mirë dhe kthimi i tij, na ka ngrohur pak më tepër.
Diagne nuk është këtu, e keni marrë vesh edhe ju më përpara. Ai është bërë baba për herë të parë. Ka marrë leje nga klubi dhe këto dy-tre ditë pritet që të kthehet dhe ne shfrytëzojmë rastin i urojmë gjithë të mirat të birit dhe atij.
Jemi gjithmonë në punë për merkaton që të marrim maksimumin dhe jemi në pritje në qoftë se e shohin të arsyeshme, drejtori dhe presidenti të afrojnë ndonjë lojtar, pasi situata varet nga ata, qoftë edhe nga ana financiare. Ne përpiqemi që çdo lojtar të cilin e aktivizojmë të japin më të mirën dhe të mos lëmë hapësira për të marrë lojtarë të tjerë.
Për ne është shumë e rëndësishme që lojtarëve tonë t’u japim mundësinë e aktivizimit dhe kur e kanë mundësinë, pse mos ta shfrytëzojnë. Për këtë është shumë e rëndësishme që ato të kuptojnë se kjo pjesë, si nga ana psikologjike, por edhe nga ana fizike, të cilën transmetojmë, ta shfrytëzojnë më së miri dhe të mos lënë hapësira.
Çdo ndeshje që kalon, ka kaluar gjysma, por çdo ndeshje si kalon dhe çdo pikë që ne lëmë na vret, sepse është një minus për ne. Megjithatë, në përgjithësi kemi bërë një sezon të mirë deri më tani, por shpresojmë që me finalizimet diçka të ndryshojë.
Me finalizimet diçka na ka “ngecur” dhe nuk kemi shënuar ato raste të cilat i kemi pasur. Shpresojmë që të shënojmë dhe të marrim pikët maksimale, sepse ashtu do nxjerrim frytet e punës që po bëjmë në stërvitje”,-mbylli prononcimin e tij, trajneri i Vllaznisë, Thomas Brdariç. /Nga Maringlen ZHIVANI/
