Pas titullit kampion, Vllaznia U-17 “rrëmben” edhe Kupën e Shqipërisë, Kubazi shkëlqen me dopietë…

Vllaznia U-17 është shpallur skuadra fituese e Kupës së Shqipërisë për grupmoshën U-17 për këtë edicion futbollistik, pas fitimit të titullit kampion. Në finalen e zhvilluar pasditën e sotme në stadiumin “Niko Dovana” në Durrës, shkodranët ia dolën të mposhtin skuadrën e Tiranës, pas një ndeshjeje me nga një gol për çdo pjesë.

Pjesa e parë e lojës përfundoi me rezultatin 0-1 në favor të Vllaznisë, me Gerald Kubazin që shënoi në fundin e këtij fraksioni, më konkretisht në minutën e 40-të. Ndërkohë, në fraksionin e dytë, në minutat e fundit shtesë të ndeshjes, Vllaznia dyfishoi rezultatin, përsëri me Gerald Kubazin, që kompletoi dopietën e tij në këtë finale.

Deri në fund, shkodranët u treguan më të saktë dhe e mbajtën të pandryshuar rezultatin, duke fituar kështu edhe Kupën e Shqipërisë, pas fitimit të titullit kampion.

Në përfundim të ndeshjes, kapitenit të Vllaznisë, Gerald Kubazi iu dorëzua Kupa e fituar, për të kurorëzuar një sezon fantastik, me fitimin e titullit kampion dhe Kupës së Shqipërisë për të dytin vit rradhazi, me ekipin e U-17 që vazhdon dominimin, ashtu siç ndodhi edhe sezonin e kaluar duke fituar të dy trofetë. /Nga Maringlen ZHIVANI/

Finalja e Kupës së Shqipërisë U-17: Tirana-Vllaznia 0-2

Golat: Kubazi 40’, 90’+5

Tirana: Babe, Dollaku (Çarkonji 90’), Dervishi, Belloj, Krajka, Bami (Elmazi 55’), Allmuça, Nela, Deda, Laçi, Patushi (në dispozicion: Zadeja, Bashari, Hida, Dashi, Hysenlikaj, Hysa, Ceca) Tr: Vangjel Mile

Vllaznia (4-2-3-1): Lekaj, Sylja, Pepnikaj, Ars. Gërbeti, Marashi (Meta 72’), Çelepija, Selmani, Kapllanaj (Likaj 65’), Hajdari (Hoxha 90’), Ara, Kubazi (kap) (në dispozicion: Arm. Gërbeti, Lilo, Hotaj, Teli, Bushati, Ymeraj, Smakaj, Spahija, Ivziku, Guri) Tr: Gilman Lika

Arbitër: Daniel Vrapi

Kartonë të verdhë: Patushi 42’, Elmazi 89’ / Ars. Gërbeti 53’, Marashi 59’, Ara 81’, Lekaj 90’