Pas betejës Basha- Berisha për lidershipin në PD, duket se edhe për gazetën “RD” janë hapur dy portale online

Në numrin e fundit për vitin 2021, “RD” gazeta zyrtare e PD- së, në versionin print shpalli ish- kryeministri Berisha si “njeriun e vitit”. Prej ditësh një rrjete sociale dhe portale, qarkullon pikërisht faqja e parë e kësaj gazete në versionin e shtypur. Madje, edhe Bledi Kasmi, kryeredaktor i “RD” ka publikuar këtë faqe gazete në profilin e tij në Facebook.

Gazeta që lindi bashkë me PD- në në vitet ’90, ka një faqe zyrtare në internet www.rd.al. Menjë kërkim të thjeshtë online, nuk rezulton asnjë publikim “Njeriu i vitit” për ish- kryeministrin Berisha. Ndërkohë, duket se faqja zyrtare në internet e “RD” është dublikuar. Ndërkohë është shfaqur aktive një faqe tjetër www.rdnews.al, e cila ngjan me një dublikim të faqes zyrtare të “RD”, duke nisur nga logoja indentifikuese.


Faqja zyrtare e “RD” në adresën www.rd.al

Nga një vëzhgim i thjeshtë në profilin e Kasmit, konstatohet se ai tashmë është pozicionuar në krah të ish- kryeministrit Berisha. Nga ana tjetër, nuk ka njoftim zyrtar për largim apo zëvendësim të Kasmit në krye të “RD” -së. Por në logon e faqes www.rd.al nuk rezulton më emri i Bledi Kasmit si kryeredaktor, duke lënë të kuptohet se ai mund të jetë larguar në heshtje.

Në atë që mund të konsiderohet përplasje për lidershipin e PD- së, mund të jetë përfshirë edhe organi zyrtar i shtypit “RD”, edhe pse deri tani nuk ka asgjë zyrtare se kush e administron. Por lehtësisht mund të konstatohet se në versionin online në faqen zyrtare www.rd.al Basha zë hapësirën më të madhe teksa tek faqja tjetër www.rdnews.al, është Berisha figurë kryesore.

Faqja jozyrtare e “RD” në adresën www.rdnews.al

Tek kjo faqe, ikonat- link të rrjeteve sociale, të ridrejtojnë në faqe që nuk kanë lidhje me “RD” zyrtare, duke lënë të kuptohet se www.rdnews.al është një faqe që është alternativë e asaj tradicionale www.rd.al. /ShkodraWeb/