Policia ka zbarkuar sot (7 janar) në orët e mbrëmjes në shtëpinë e Ervis Martinaj në Surrel. Sipas News24, në banesë janë marrë vetëm dokumente ndërsa mësohet se në banesë nuk ka qenë asnjë familjar i tij.
Kontrolli në vilën e të shumëkërkuarit Ervis Martinajt u dha me urdhër të SPAK, ndërsa më herët gazetari Artan Hoxha tha se forcat speciale për më shumë se dy orë mbajtën të rrethuar shtëpinë e Martinajt.
“Burime nga drejtuesit e aksionit ne Surrel, konfirmuan se, veprimet po kryhen ne kuader te hetimit te SPAK, ne lidhje me operacionin “Plumbi i arte”, i nisur pas deshmive te bashkepunetorit te drejtesise Nuredin Dumani”, shkroi gazetari Hoxha në Facebook.
Kujtojmë që më datë 26 dhjetor 2022, Fushë Kuqja ishte e blinduar në çdo rrugicë të saj dhe qëndroi nën presionin e policisë për rreth katër orë.
Këto kontrolle u kryen me vendim gjykate në funksion të dosjes hetimore që SPAK ka hapur ndaj Ervis Martinajt pas operacionit “Plumbi i Artë” si edhe për të shuar pikëpyetjen për fatin e të shumëkërkuarit i cili u denoncua i zhdukur që më 9 gusht nga familjarët.
Në një njoftim zyrtar policia sqaroi se mbi bazën e vendimit të Gjykatës së Posaçme të Shkallës së Parë për Korrupsionin dhe Krimin e Organizuar, në kuadër të procedimit penal të vitit 2022, regjistruar në SPAK, për vepra të rënda penale të kryera në formën e grupit të strukturuar kriminal, ushtruan kontroll në banesat e Ervis Martinajt dhe xhaxhallarève të tij, Faik Martinaj dhe Ragip Martinaj.
