Kryetarja e Lëvizjes Socialiste për Integrim, Monika Kryemadhi në një lidhje për të “Pa ekspozuarit” në News 24, tha se KQZ dhe Parlamenti po zvarrisin qëllimisht mandatin e deputetëve të rinj për të zgjatur sipas saj, idenë që Parlamenti të mos konsiderohet ilegjitim.
“Ajo që ndodh faktikisht është që Parlamenti shqiptar dhe KQZ-ja po zvarrisin sa më shumë këtë proces, për të zgjatur procesin e vakancave sepse nuk i kanë të gjitha listat. Sa më shumë të zgjatet procesi i vakancave zgjatet më shumë ideja që Parlamenti është ilegjitim. Nga 100 kandidatë, 17 do ta pranojnë mandatin. Jo të gjithë janë trima. Ka edhe njerëz që kërcënohen, që edhe blihen. Kanë një të kaluar të errët. Nuk i njohim më dhe nuk janë pjesë e LSI-së. I kemi dërguar edhe një letër KQZ-së”, tha Kryemadhi.
Kryemadhi u pyet edhe për deputetin Lefter Koka nëse ishte ende pjesë e kësaj partie, duke thënë se në Durrës është komanduar ish-ministri Nasip Naço.
“Ka një mbledhje ku kryetarja e LSI një javë pas deklarimit të zt.Koka ka ngritur grupin e punës dhe në krye të grupit të punës është Nasip Naço në Qarkun e Durrësit. Në LSI nuk përjashtohesh, por vetëpërjashtohet”, shtoi ajo.
