Në prag të Ditës Botërore të Teatrit, në Kalanë e Prezës, Bashkia e Vorës organizoi një aktivitet të veçantë, në nderim të Tinka Kurtit, shkodranes së papërsëritshme të skenës dhe ekranit, “Nderi i Kombit”, që i bën nder Shkodrës sa herë deklaron si origjinën e saj, pavarësisht lindjes në Sarajevë.
Ka qenë një publikim në rrjetet sociale i disa fotove nga aktorja Rita Gjeka, e cila natyrisht, bashkë me legjendën tjetër Zyliha Miloti, ishin të vetmet shkodrane që morën pjesë në përurimin e “Shtegut të Tinka Kurti” në Kalanë e Prezës. E në fakt, tingëllon shumë e çuditshme që askush nuk u kujtua në Shkodër për këtë divë të padiskutueshme, sidomos në Ditën Botërore të Teatrit, personifikim i paarritshëm i së cilës, është pikërisht Tinka.
Nëse mund të “falet” harresa e një aktiviteti nga Teatri “Migjeni” pikërisht për Ditën Botërore të Teatrit, vështirë të kapërdihet harresa për Tinka Kurtin, natyrisht edhe për emra të tjerë tashmë në përjetësinë e këtij arti skenik. Nëse ka diçka që na veçon dhe me të cilën krenohemi ndër breza, është pikërisht arti, i ngritur në nivele shumë të larta kombëtare e më gjërë, pikërisht nga emra si ai i Tinka Kurtit.
Diçka të fundit. Mbase mund ti nderojmë postum, mund të ngrejmë buste e vendosim emra rrugësh e institucionesh por detyrimi parësor, edhe njerëzor, është i nderojmë e vlerësojmë sa i kemi mes nesh. Trashëgimia e tyre është e përjetshme por fizikisht, nuk mund ti kemi gjithmonë. Prej shumë vitesh tashmë, familja e Tinka Kurtit janë aktorët, artistët, regjisorët. E të parët, më të preferuarit e saj, janë e duhet të jenë ata shkodranë. Mjafton të shihni këto foto për ta kuptuar nga fytyra e Tinkës.
E në fund, një pyetje naive e retorike: Nëse gjendet vend në Kalanë e Prezës për Tinka Kurtin, kalaja “Rozafa”, më e madhja në Shqipëri, nuk ka një hapësirë për të?! Por fillimisht, dikujt/disave, duhet ti shkojë mendja. E për ironi të fatit, jo pak mendje paguhen me lekët e taksapaguesve shkodranë pikërisht që ti shkojë mendja! /ShkodraWeb/
