“Panuçi ik” shpërtheu natën e kaluar në stadiumin “Loro Boriçi” të Shkodrës pasi Kombëtarja e nisi me humbje rrugëtimin drejt fazës finale të “Euro 2020”. Në fakt, nuk ishte fiks “Panuçi ik” por një shprehje në italisht që ushtoi në stadium dhe që zakonisht në përkthimin e filmave në shqip poshtë ekranit shkruhet “vafsh në djall”.
“Loro Boriçi” është një nga impiantet e futbollit shqiptar që në shumicën e rasteve, ka qenë ndjellamirë për ekipet shqiptare. Qoftë klube apo edhe kombëtare. Megjithatë, mbrëmë ishte një “Vaterlo” që nuk paralajmëron asnjë shije të mirë për ecurinë e mëtejshme të kuqezinjëve.
Edhe para ndeshjes, presidenti Duka ka patur dyshime. Krejt “rastësisht” në Shkodër ka qenë spektator një trajner i njohur po italian, Edi Reja. I njohur si teknik jo pa emër, Duka po thuhet se ka hyrë në bisedime për të zëvendësuar Kristian Panuçin, të cilin as thirrjet marroqe në kryetituj gazetash prestixhore “Kristian, thyeji turqit”, nuk e mobilizuan si duhet.
“Panuçi ik” nga populli futbolldashës erdhi në të njëjtën kohë me “Rama ik” të popullit opozitar. Nuk është çudi, meqë jemi në sferën e sportit, të plasin bastet sportive: Tani që “Panuçi ik” dhe efekt, po “Rama ik” a do të ketë të njëjtin efekt?
Trajneri i Kombëtares kishte një “mandat” të paktën deri në vitin 2020 dhe mori përsipër të çojë Shqipërinë në Europë. Atë të futbollit. Për të arritur suksesin, ai kishte në dispozicion disa ndeshje por në të parën, “u nis në shtëpi”. Edi Rama ka një mandat (edhe pse të kontestuar sot por jë në 2017-ën) deri në vitin 2021. Edhe ai ka premtuar ta çojë Shqipërinë në Europë. Në Europën e Bashkuar që po bëhet gati të nxjerrë jashtë saj Britaninë e Madhe.
Mbi kokën e Panuçit ishte një president, ashtu siç edhe në krye të shtetit kemi një president. Por Duka kishte më shumë pushtet se Meta. Nga ana tjetër, Panuçi nuk kishte “numra në Kuvend” që i ka Edi Rama. “Pushteti” i tij ishte i lidhur direkt me vendimmarrjen e Dukës.
Panuçi mud të kishte një shans me Andorrën modeste, por nuk iu dha nga Duka. Edhe Rama e ka një shans me BE-në, kundërshtar më i rreptë se Andorra por që duhet të presë fundin e qershorit për të mësuar “rezultatin”.
Bastet kanë nisur! Tani që Panuçi iku, a do të ikë edhe Rama? Se kush i bënte më shumë dëm Shqipërisë me qendrimin në pozicionin aktual? Tifozët me patjetër thonë Panuçi…/Shënim i ShkodraWeb/
