Deputeti demokrat Dashnor Sula pretendon se nuk do të jetë në listën e opozitës për kandidat si deputet në zgjedhjet e 11 majit.
Në një intervistë për “Shqipëria Live” me Sidorela Gjonin ai tha se pasi është informuar se nuk do të jetë pjesë e listës, ka kontaktuar Sali Berishën, por ky i fundit nuk i është përgjigjur.
Sipas Sulës, ai është hequr nga lista pasi është një mbështetës i SPAK-ut dhe sipas tij, çdo deputet që mendon ndryshe nga Berisha, Vokshi dhe Noka, do të fshihet nga ajo listë.
“Do të themi dhe gjërat e tjera, kaq mjafton sot për sot. Bëhet fjalë mos të jem fare pjesë e listës. Nuk jam negociuar, madje i kam shkruar edhe Berishës mesazh për ta takuar, nuk kam marrë as një përgjigje. Kam dhe gjëra që nuk i them publikisht. Unë di që do fshihen të gjithë ata që nuk mendojnë si Berisha Vokshi dhe Noka. Unë i kam dalë i pari në qarkun e Elbasanit dhe nuk u kam kërkuar asnjë votë.
Derisa të mbyll do i respektoj, moralisht jam i fituar. Nuk kam besimin e liderit Berisha tani s’kam ça bëj unë. Më thanë disa kolegë të PS, pas Saliut ti ke qenë më i egër me ne. Edhe sot isha në byronë e Kuvendit votova kundër atij komisionit Xhafaj. Ky komision është ngritur për të penguar SPAK dhe GJKKO.
Gjënë më të shenjtë kam lirinë, sa të jem gjallë do flas dhe mbroj interesat e shqiptarëve. Lista e Elbasanit do duhen të jenë njerëzit që e meritojnë. Ne rrezikojmë të dalim me 4 mandate në Elbasan, kjo më shqetëson mua”-u shpreh Dash Sula për “Shqipëria Live”.
Ndërkohë, një tjetër eksponent largohet nga Partia e Lirisë. Bëhet fjalë për Esmeralda Demirajn, e cila deri tani ka mbajtur postin e kryetares së Lëvizjes së Gruas në PL.
Me anë të një njoftimi në Facebook, Demiraj njofton se po ashtu tërhequr nga të gjitha funksionet që mbante në këtë force politike, Kryetare e Lëvizjes së Gruas për Integrim në Partinë e Lirisë për Shqipërinë, anëtare e Kryesisë së Partisë së Lirisë dhe e Kryesisë Ekzekutive, anëtare e Komitetit Drejtues Kombëtar, nënkryetare e Komisionit të Organizimit të Tiranës si dhe e deleguar politike në Njësinë Administrative Nr. 4, Tiranë, për zgjedhjet e 11 majit 2025.
Ajo thotë se ka ardhur koha për të ndaluar dhe për të kërkuar mundësi të tjera që siç shprehet “më ofrojnë një mjedis ku vlerësimi dhe respekti janë të ndërsjella, dhe ku meritokracia është parimi udhëheqës”.
“Besova fort se politika është një mjet për të sjellë ndryshim dhe për të mbrojtur interesat reale të qytetarëve. Megjithatë, kur kushtet nuk të lejojnë të bësh atë që ke premtuar, kur ndjen se nuk mund t’u shërbesh më njerëzve siç duhet, atëherë largimi bëhet zgjedhja më e drejtë dhe më e ndershme”, shkruan Demiraj.
