Detaje të reja janë bërë publike nga mbledhja e përbashkët e grupeve parlamentare PD-LSI pasditen e sotme. Dy partitë më të mëdha opozitare në vend po planifikojnë nisjen e protestave popullore kundër rritjes së taksave. Burime për “BalkanWeb” sqarojnë se kreu i PD-së Lulzim Basha ka theksuar në mbledhje se, “Është momenti për të qenë në krah të njerëzve”. Ai ka shtuar se do t’i bëhet thirrje qytetarëve që të mos paguajnë disa taksa dhe tarifa.
“Vendimin duhet ta vëmë menjëherë në zbatim. Thirrje qytetarëve për të mos paguar taksën e Rrugës së Kombit, taksën e karburantit, taksen e rritur të pronës, të biznesit të vogël, tarifën e rritur të ujit. Në këtë situatë ku Rama e futur vendin, ne nuk ndjekim interesin tonë vetjak, por duhet të lidhemi me qytetarët. Duhet të jemi në krah të njerëzve. Të vendosim cilat janë hapat e parë, duke nisur me praninë masive të opozitës në sallën e gjyqit, sepse ata janë simboli i mosbindjes civile. Ne nuk çojmë kërkesë për leje në polici. Do ta kërkojmë kur të jetë arrestuar Olsi Rama, Agron Xhafaj, Saimir Tahiri”, është shprehur kryedemokrati Basha.
Gjatë mbledhjes ka reaguar edhe ish-kreu i PD-së, Sali Berisha. Teksa e cilësoi kryeministrin Rama “barbar të vërtetë”, Berisha tha se protestat do të vijojnë deri në përmbysjen e kësaj qeverie.
“Lëvizjet e mëdha fillojnë kur s’e pret. Ne kemi përballë një barbar të vërtetë që nuk ka lënë asgjë pa përdorur, në radhë të parë kundër opozitës. Ndaj Kukësi e nisi, e ndezi shkëndijën. Ne nuk largohemi deri në përmbysjen e kësaj qeverie. A jemi shumë apo pak? Me siguri absolute ju them jemi shumë. Kjo është mosbindje me vendosmërinë që ta nisim dhe nuk kthehemi më”, është shprehur Berisha.
