Nuk është hera e parë, fatkeqësisht nuk do jetë as e fundit që në venddepozitimin e mbetjeve në Bushat, është shfaqur apo ka rënë zjarr. Ndoshta ky i fundit, i pasdites të së dielës, doli pak jashtë kontrollit, edhe për shkak të erës. Faktin e zjarreve të herëpashershme, e dinë shumë mirë banorët të fshatrave rrotull landfildit por edhe në brendësi të qyteteve Shkodër e Lezhë.
Në jo pak raste, zjarret fshihen me mjeshtëri, duke përzgjedhur me kujdes atë që duhet djegur për të “liruar vënd” për mbetje më të kushtueshme se të tjerat, në kuptimin e minimizimit të tymit. Në raste të tjera, paralajmërohen “goma që digjen” nga njerëz “të papërgjegjshëm”, të cilët çuditësisht, asnjëherë nuk penalizohen as nga policia dhe as nga agjencitë e shumta, edhe të mbrojtjes së mjedisit.
Siç dihet, ka mëse 15 vite që tashmë në këtë landfild, depozitohen mbetje inerte nga më të ndryshmet e sidomos, nga ato teknologjike që janë gati- gati “ar i zi” për paratë që paguhen për ti depozituar. Në këto kushte, të paktën nga viti 2008 kur u regjistrua zyrtarisht në QKB dhe deri më sot, hapësira e depozitimit do të duhej zvogëluar në maksimum. Ndërkohë, edhe pse sasia e mbetjeve që depozitohen, nga viti në vit rritet e do të rritet në vijim, vendi i depozitimit duket se zgjerohet.
Në fakt, sipërfaqja e përgatitur për depozitim, është përcaktuar dhe nuk shtohet por thjesht bëhen “marifete” por duke u kujdesur maksimalisht që zjarri të mos dëmtojë shtresat që duhet të pengojnë kalikimin e solucioneve të dekantimit në tokë. Ndërkohë, banorët të qarqeve Shkodër e Lezhë, shumë herë kanë denoncuar ndotjen e mjedisit pikërisht për shkak të këtij landfildi, madje duke kërkuar edhe të mbyllet.
Për hir të realitetit, pavarësisht bashkive që depozitojnë mbetjet e tyre urbane, kuptohet kundrejt tarifave për ton, Shoqëria Ndërkomunale Bushat Sh.A është 100% në pronësi të Bashkisë Vau Dejës dhe administraohet nga një Këshillit 6 anëtarësh, mandati i të cilëve u mbaron në shtator 2028 ndërsa administrator deri në fillim korrik 2026, është Gjergj Vasija.
Ky zjarr por edhe të tjerët, edhe pse më të vegjël, janë të dëmshëm për shendetin e njerëzve nëse jetojnë në Shkodër apo Lezhë si qark. Ky është një lajm i keq por në kuadër të përgjegjësisë së administrimit, si çdo Sh.A., qoftë edhe shtetërore, ligji përcakton qartë përgjegjësinë e secilit, që nga Asambleja, Këshilli Mbikqyrës dhe Administratori. Kështu ka qenë para 2015- së, edhe pas këtij viti kur u ndryshua ligji për qeverisjen vendore por edhe pas 2023, ku pari ndryshime drastike në qeverisjen lokale. Në sferën e betejës politike apo edhe individuale, secili ka të drejtë të japë një opinion. Por për të folur “me letra”, mjafton të hyni në QKB. Për lehtësi, mund të klikoni edhe linkun për të parë çdo të dhënë deri ditën e sotme. Tregohuni të mençur, mos i besoni askujt, as këtyre reshtave, lexoni dokumentet zyrtare online dhe kuptoni vetë. Kliko KËTU. /ShkodraWeb/
