OPINION – “Shqipëria bëhet” e Adriatik Lapajt si “parti e të gjithë popullit”, pa ideologji udhëheqëse…

“U mbars mali dhe polli një…parti”, në respekt të atyre që besojnë akoma në sloganin “Shqipëria bëhet”. Sigurisht, lindi edhe një parti tjetër në këtë vend, ku çdo bark jo njerëzor që mbarset, pjell një parti. Në fillim, edhe si lëvizje.

Adriatiku me emrin e veçantë por aspak të rrallë, kopjuar lehtësisht nga deti që lag prej shekujsh Shqipërinë në brigje, i dha jetë një subjekti pa një ideologji udhëheqëse. Shkurt, parti të tipit “të të gjithë popullit”.

Ashtu si të gjitha partitë e tjera, Lapaj paralajmëron një tur takimesh, bashkëbisedime me popullin. Ndryshe nga partitë pararadhëse, Adriatiku edhe pse me emër deti, e nis nga malet. Pikërisht nga Mirdita, ndërsa partitë që ishim mësuar të kundronim, e nisnin nga qendrat e mëdha urbane. Risi, mesazh apo çfarë?

Në fakt, është turi i dytë pas një turi jo shumë të bujshëm e publik. Madje, Lapaj ishte edhe në Shkodër, ku si për ironi të fatit, takoi eksponentë të rëndësishëm të partive “të vjetra”. Madje, disave u kërkoi ti bashkohen lëvizjes së tij të re.

1.Reformimi i sistemit zgjedhor në Shqipëri duke hapur konkurrencën nëpërmjet hapjes së listave, kufizimit të mandateve qeverisëse dhe përfaqësuese;

2.Miratimi i ligjit “Për referendumet” në Republikën e Shqipërisë;

3.Miratimi i votës së emigrantëve duke përcaktuar modalitetet e përfaqësimit të tyre.

4.Depolitizimi i administratës zgjedhore në të gjitha nivelet duke e hequr atë nga politika dhe duke e kaluar në profesione të lira (avokat, noter, profesionistë të licencuar, si dhe përfaqësues të sistemit të drejtësisë si gjyqtarë dhe prokurorë);

Nga 1-4 që mund ti lexoni më sipër, ishin objektivat apo synimet e “Shqipëria bëhet”. Sa qindra herë i kemi dëgjuar të artikuluara tash 30 vite këto slogane sepse deri më sot, nuk rezultojnë si synime. Përndryshe, do ishin miratuar.

Adriatiku jo shumë i ri në politikë, pasi provoi Aleancën Kuqezi pa një ideologji udhëheqëse, rikthehet në të njëjtat gjurmë. Këtë herë jo si numri 2, 3 apo katër por si numri 1, ideues e drejtues, duke patur në pjesën e padukshme, mbështetjen e përfaqësuesve të më të fortëve të globit.

Në Shqipëri, thuajse të gjithë biem dakort se kemi kuadrin ligjor, mbase, më të mirin e përparuarin e globit. Ku çalojmë? Tek zbatimi i tij në praktikë. Cilat janë garancitë që Lapaj jep për realizimin e 4 objektivave madhore më sipër? Apo është thjeshtë një provë e radhës, eksperiment?

Në fakt, ka një hapësirë që Lapaj mund ta lundrojë. Atë të të pakënaqurve nga të gjitha partitë, ata që nuk shkojnë të votojnë për asnjërin subjekt apo kandidat. Po cila është ajo forcë “magjike” apo “magnetike” që Adriatiku zotëron? Të paktën deri sot, nuk po e shpërfaq. /Nga Blerti DELIJA/