Dita e heshtjes zgjedhore, si mundësi reflektimi para hedhjes së votës në kuti. Është kjo e shtunë e 10 maj 2025, datë e zakonshme por mjaft e rëndësishme, madje për 4 vitet e ardhshme. Vetëm pak orë më pas, shqiptarët do të depozitojnë në kutitë e votimit vullnetin e tyre, ndërsa ata rezidentë jashtë Shqipërisë, e kanë mbyllur tashmë brenda një zarfi që duhet të mbërrijë në KQZ jo më vonë se ora 19.00 e datës 11 maj 2025.
Kjo fushatë zgjedhore, ka shënuar disa risi krahasuar me paraardhëset. Ishte më e gjatë, shumë më e gjatë se të tjerat. Madje, mund të thuhet se ka nisur që në ditët e para të këtij janari, teksa faktikisht, ka vijuar 3 muaj pa ndërprerje, edhe pse Kodi Zgjedhor zyrtarisht nuk lejonte më shumë se 30 ditë me cak final 10 majin.
Tjetër veçori është vëmendja e marrë nga të ashtëquajturat “parti të reja”, të cilat ndryshe nga radhët e kaluara që nuk kanë munguar, janë shfaqur më të organizuara, më të mbështetura edhe nga qytetarët. Ambicjet e tyre janë shfaqur haptas, duke folur për “mandate të marra” deri në formim grupesh parlamentare në Kuvendin e ri, pra jo më pak se 7 deputetë.
Risia më e madhe është vota e emigrantëve shqiptarë. Është pikërisht kjo votë, e cila mund të konsiderohet “e panjohur” e këtyre zgjedhjeve, mbase me ndikim edhe në rezultatin final të tyre. Shumë janë regjistruar për të marrë pjesë por me gjasë, rreth gjysma e tyre mund të ushtrojë të drejtën e votës. Gjithsesi, kjo votë e ndarë sipas qarqeve, kur të numërohet, mbase mund të ndryshojë edhe ekulibre në shpërndarje votash, rrjedhimisht edhe të mandateve.
Si rrallëherë, strukturat e specializuara të shtetit si SPAK, BKH apo edhe policia, “u ndjenë” në terren në kërkim të “krimeve zgjedhore”. Nëse nuk do të ketë rezultate konkrete- deri në arrestime, të paktën “fryma e frikës” u ndje. Ajo ishte e dukshme edhe fushatën e organizuar në terren e media, ku “varfëria financiare” ishte e qartë.
Për ta mbyllur këtë përsiatje, interesant janë edhe numrat që publikisht, subjektet politike kanë deklaruar se do të marrin nga shqiptarët. Edhe nëse numri i mandateve do të ishte ai i zgjedhjeve të para të pas 1990- ës, vështirë të jetë i mjaftueshëm për të shuar “etjen publike” të partive tona politike. Synimet e shfaqura, kalojnë ndjeshëm edhe numrin 250 teksa në Kuvend mund të ulen vetëm 140 deputetë.
Nisur nga kjo, “ngatërruar” me sondazhet e anketat, parashihet respektimi i përpiktë i skenarëve të zgjedhjeve të kaluara, duke i bërë të ngjashme si dy pika uji. Humbësi do të kontestojë, do të flasë për manipulim, blerje votash, banda kriminale, presion mbi administratën, manipulim i votës së Diasporës e të tjera versione tashmë të njohura. Fituesi, me një vesh nga Europa dhe SHBA, do të nxitojë të shpall fitoren, mbase edhe pa u publikuar rezultati nga KQZ. Në fund, shqiptarët do të vazhdojnë të jenë të lumtur…edhe ditën e parë pas zgjedhjeve. /Shënim i ShkodraWeb/
