Protesta tashmë ka kristalizuar kërkesat e saj, të cilat ditë pas dite, çdo ditë të saj, po artikulohen nga folës- protestues të ndryshëm. Nuk ka asnjë dyshim se të gjitha kërkesat, për tu përmbushur apo plotësuar, kanë nevojë fillimisht për vullnet politik e më pas, edhe për vota- numra të mjaftueshëm në Kuvend. E në këtë institucion, fuqiplotë është Partia Socialiste dhe lideri i saj e kryeministër, Edi Rama. Është e pamundur që ky segment i politikës, të dalë kundër vetes dhe të firmosë fundin e pushtetit, duke nisur me dorëheqjen e shefit të qeverisë.
Por besojmë se ka dhe duhet të ketë edhe një rrugë tjetër, kushtetuese dhe që mund të plotësojë ose jo, kërkesat e protestuesve. Referendumi!
Është mekanizmi më demokratik, më i drejtëpërdrejt i ushtrimit të pushtetit nga sovrani popull! Mbledhja e firmave për thirrjen e referendumit, duket se nuk përbën problem nga organizatorët, përsa kohë mijëra mblidhen në shesh rregullisht çdo pasdite. Në fakt, jo për kërkesat e protestës por ka një nismë për referendum të depozituar në KQZ nga një grup nismëtar. Shumë nga kërkesat e tyre, tashmë janë adoptuar edhe nga protesta, natyrisht duke shtuar edhe të tjera, nga dorëheqja e kryeministrit.
Ligjërisht, është e vështirë të bëhet pjesë e referendumit kërkesa për dorëheqjen e kryeministrit, i cili sipas Kushtetutës, mandatohet nga Presidenti i Republikës dhe miratohet nga shumica e Kuvendit. Megjithatë, për formulimin e duhur juridik të kësaj pyetjeje, mund të gjendet nga juristët dhe konstitucionalistët që tashmë janë pjesë e protestës.
Mund të kërkohet tagër ligjor në KQZ për të nisur mbledhjen e firmave të qytetarëve për këtë referndum dhe rezultati i tij, jo vetëm do të ishte i kontestueshëm por edhe do të ishte i detyrueshëm për zbatim nga çdo institucion, edhe monokratik siç është kryeministri i vendit.
Arsyeja që kjo mund të jetë një zgjidhje, është edhe çeshtja e “numrave”. Askush nuk mund të thotë nëse në shesh janë aq apo kaq mijëra protestues, ndërsa kryeministri i vendit artikulon shumë shpesh mbështetjen e mbi 800 mijë shqiptarëve në zgjedhjet e një viti më parë, të njohura e certifikuara brenda e jashtë vendit. Nëse referendumi do të mbështeste kërkesat e protestës, mes tyre edhe dorëheqjen e shefit të qeverisë, atëherë nuk do të kishte asnjë “mburojë” numrash për kryeministrin.
Ky arsyetim, kjo logjikë, gjithmonë nëse kërkohet realisht që të gjendet zgjidhje ligjore, kushtetuese për protestën që sot shënon ditën e 27- të pa ndërprerje. Gjithmonë nëse kërkohet një produkt, rezultat, edhe ligjor për një përpjekje shumë të fortë dhe në vazhdimësi të një numri jo të papërfillshëm pjesëmarrësish në protesta. /ShkodraWeb/
