Në sovranitet të plotë, me gjasë jo vetëm nga velja prej politikës por edhe për ndonjë ofertë “të majme” financiare nga një prej televizioneve të vend, Grida Duma ka dhënë dorëheqjen nga mandati i saj si deputete e PD- së në Kuvend.
Ata që e njohin nga afër e dinë se sa shumë u përpoq Duma para zgjedhjeve të 25 prill 2021 për të zënë një vend të sigurtë në listën e PD- së për Tiranën dhe ia doli të ulet në sallën e parlamentit.
Terheqja e beftë erdhi “si rrufe në qiell” të hapur, teksa janë akoma të freskëta pamjet e saj që hynte e dilte nga selia e PD- së e rrethuar nga badigardë ndërsa ndjehej e kërcënuar nga demokratët që mbështesnin Berishën jashtë ndërtesës blu.
Nën udhëheqjen e PD- së nga Basha, politikisht Duma arriti në majat më të larta, edhe si nënkryetare e PD- së, postë që e liroi bashkë me të tjerët, me gjasë për ti hapur rrugën Gazment Bardhit, pa mbledhur Kuvendin Kombëtar, të komandojë Enkelejd Alibeajn në krye të PD- së pasi Lulzim Basha dha dorëheqjen nën presionin e zgjedhjeve të pjesshme vendore të 6 marsit të këtij viti.
Ndërsa natyrshëm Berisha fuqizohej deri në futjen në selinë blu pas vendimit të Gjykatës së Shkallës së Parë, Duma nuk e shihte më veten si qendrestare e paepur ndaj “non gratës”, si shumë kolegë të tjetër, mbështetës të Bashës apo Alibeajt. Madje, kohët e fundit “Nora e Kelmendit” siç e etiketoi publikisht Berisha, thuajse u rreshtua në krah të liderit të PD- së.
Pritej që gradualisht, Duma “të kapërcente ylberin” brenda familjes demokrate dhe të bëhej pjesë e mbështetësve të Berishës zyrtarisht, si pjesë e Grupit Parlamentar. Në fakt, mbrëmë u përfol dhe sot dha dorëheqjen nga mandati i deputetit. Pak orë pasi të njëjtën gjë bëri edhe “malësori” Alfred Rushaj, i cili për hir të realitetit qëndroi në hije gjatë përplasjes Basha- Berisha. Edha ai hoqi dorë nga nënkryetarllëku, madje edhe nga drejtimi i Grupit Parlamentar të PD- së.
Deri tani të paktën, askush nuk shprehu keqardhje publike për ikjen e Rushajt, edhe pse konsiderohet si një nga ekspertët më të mirë të ekonomisë, fushë nga e cila priten mendime të vyera edhe nga radhët e opozitës. Nuk derdhën lot as burra e as gra për largimin e papritur të Rushajt, edhe pse për hir të realitetit, kohët e fundit, rrallë e më rradhë shfaqej në parlament.
Lotët rrodhën rrëke për ikjen e Grida Dumës nga Kuvendi. Ndërsa konfirmohen lotët në faqet e një zonje deputete, janë në dyshim ato në mollëzat e një deputeti të PD- së. Nuk do të ishte turp, madje do të ishte vlerë. Por sigurisht, ka një pyetje: Ishte më e hidhur të largohej Duma apo Rushaj? Duheshin “vajtuar” të dy apo asnjëri? Apo mbase Rushaj konsiderohej “më tradhëtar” se Duma?
Është me interes të pritet nëse Alfred Rushaj do të mbledhë mediat për të paraqitur publikisht dorëheqjen për të parë nëse do ti dhimbset kolegëve ashtu si Duma atyre. Edhe pse duket se tashmë Rushaj nuk do u’a japë këtë “kënaqësi” apo “siklet” kolegëve të tij. Dorëheqja e tij është dorëzuar tashmë.
Leximi më i thjeshtë i heqjes dorë nga këto mandate, përveç vullnetit (besojmë) individual të Rushajt dhe Dumës, mund të lexohet si “hapje krahu” për dy mbështetës të qartë të Basha- Alibeaj. Dorëheqje në emër të mirënjohjes për futjen në listën e sigurtë të deputetëve me 25 prill 2021. Ori Nebiaj, prezantuesja që duket e lëkundur për të pranuar ose jo vendin e lënë bosh nga Duma por edhe Petrit Doda, do të futen në Kuvend si besnikë të Basha- Alibeaj. Është qokë edhe në prag të zgjedhjeve të 14 maj 2023, ku roli i deputetëve është jo pa peshë.
Qurravitjet e kolegëve deputetë për vetëlargimin e Dumës nga Kuvendi, ngjajnë shumë me ato të Bashës pasi Rama “i vidhte” zgjedhjet. Sigurisht, në të dy rastet një fasadë e bukur përballë demokratëve dhe shqiptarëve jashtë PD- së. Mandatet e Rushajt, Dumës dhe shumë të tjerëve, mbajnë në pjesën e pasme emrin e Lulzim Bashës. Është borxhi që i kthyen për karrierën e shpejtë dhe jo të pasuksesshme (me përfitime të dukshme e të padukshme) që morën nga viti 2013. /ShkodraWeb/