Në ditën e 22- të të saj, protesta ka hyrë në hullinë e duhur, duke u shfaqur jo vetëm politike por edhe drejtpërdrejtë kundër mazhorancës e qeverisë aktuale, duke “harruar” opozitën dhe parrullën bashkëshoqëruese “Rama në burg, Berisha në burg”. Të gjitha kërkesat e bëra publike, në emër të një grupimi koordinator të protestës, i adresohen kësaj pjese të politikës 35- vjeçare.
Me gjasë, baraslargimi në mes pozitë- opozitës si bashkëfajtorë, e mbylli “misionin”. Sheshi u mbush nga të pakënaqur të 35 viteve tranzicion, të përsonifikuara nga dyshja Rama- Berisha. Tashmë avancohet me hapin tjetër, për shumë arsye por kryesorja sepse pushtetin, në të gjitha kuptimet- ekzekutiv dhe legjislativ, e ka Edi Rama, i fortë me 82 mandate në Kuvend, pasi Marjana Koçeku u shpall e pavarur si deputete.
Pavarësisht masivitetit të protestës, çdokush është i qartë se çdo ndryshim, nis dhe bitis përmes votës, numrave. Kërkesat, po i thonë Ramës, në kapërcyell të vitit të parë të mandatit të katërt 4- vjeçar, të vetërrëzohet, ti hapë rrugë një qeverie që detyrimisht duhet të mbështetet me votat e PS- së së tij në Kuvend se kush tjetër nuk ka numra, madje, duke e paralajmëruar “rri gati se do të jesh edhe për burg”. Këtë herë, i vetëm, pa Berishën.
Në fakt, në pamje të parë kërkesat janë utopike. Bonusi i vetëm që Rama mund të japë, nëse do ta japë, është organizimi i zgjedhjeve të parakohëshme, brenda 45- ditëve siç e përcakton Kushtetuta dhe, siç e kemi thënë edhe herë të tjera, edhe protestuesit janë të detyruar të votojnë “partitë e vjetra” ose ato “të reja” që kanë garuar edhe me sistemin e vjetër.
Vetëm ndonjë ekses, ngjarje e jashtëzakonshme apo tragjike, mund të ndryshojë qasjet e mësipërme. Por edhe në ato raste, që urojmë të mos verifikohen, domosdoshmërisht kalojnë sërish sipas përcaktimeve kushtetuese dhe ligjore, me ndryshimin e vetëm që ndoshta, atëherë Rama nuk do të jetë sërish kandidat për kryeministër.
E ndërsa protesta vazhdon, janë bërë publike kërkesat, është harruar deri diku zanafilla: fillimisht Baks- Rrjolli, i cili edhe pas shumë muajsh nuk ka ndjeshmërinë aq të lartë publike si dhe Zvërneci. Në Velipojë vazhdon puna për ndërtimin e resortit turistik, ndërsa në Zvërnec, me gjasë, pas përfundimit të etapeve ligjore pas lejes zhvillimore, edhe aty do të nisë puna për ndërtimin e kompleksit. Përveç rastit, kur mund të tërhiqen vetë investitorët.
Nëse protesta nuk kristalizohet në formësimin e një apo më shumë lëvizjeve politike apo partive, nëse nuk merr kohën e duhur për tu organizuar e ngritur, të gjithë skenarët e tjerë nuk shkojnë në favor të “shembjes së sistemit” aktual politik. Përkundrazi, janë në favor të tij dhe zgjatjes së jetës së tij. /Nga Sokol N. SOKOLI/
