Pas 30 vite luftë për demokraci, demokratët “kuptuan” se paskan luftuar me mullinjtë e erës, se paskan mbajtur të keqen brenda tyre, se nuk qenkan shkëputur ende nga mendësia komuniste. Dhe nevojitet reformim!
Premtimi se nga sot do të krijohet njeriu i ri “demokratik”, bazuar në një mendësi krejt ndryshe nga ajo komuniste – në vetvete është një mendësi komuniste.
Z. Basha, ju harroni se komunistët që po shani sot, një pjesë e tyre nuk kanë bërë asgjë më shumë. Lejuan për shumë vite të sundonte një e keqe, diktatura, të cilën e besuan të mirë për interesa të ngushta personale, ashtu si edhe ju. Komunist nuk të bën mosha dhe as mbiemri, por mentaliteti. Pikërisht ky mentalitet që po i tregoni sot shqiptarëve, se i lejoni vetes privilegjin të gaboni, jo njëherë por për 15 vite a më gjatë, pasi jeni i bindur se keni kuptuar gabimin sot dhe do të ndryshoni mot.
Demokracia nuk funksionon kështu! Fillimisht ju duhet të merrni përsipër përgjegjësinë e gabimeve tuaja dhe pastaj të dënoni gabimet e të tjerëve, por jo nga e njëjta karrige ama.
Sot, pas dy kuvendesh dhe një referendum, nuk ka asnjë të fituar në Shqipëri. Mbijeton ende shpresa e kyçur në dry për demokratët e lirë, një shpresë që kërkon të shpëtojë duke u kapur me thonj pas të kaluarës, pasi e tashmja thjesht nuk ekziston. Dhe për këtë jeni edhe ju fajtor! /Nga Eli GOLEMI, publikuar në Facebook/
