OPINION NGA MUSA KURTULAJ – Për 8 janarin tragjikomik në selinë e PD- së, Berisha dhe Basha janë “ujku”…

Berisha dhe Basha janë “ujku”, ndërsa në studiot televizive u bien tam- tameve të gjurmëve ! Çdo devijim nga kjo analizë, nuk bën gjë tjetër veçse errëson të vertetën e 8 janarit! Fatkeqësisht, këtë devijim po e bëjnë qëllimisht disa media me “qit e prit”, “jo e lagu, jo se lagu”, ndërkohë që gjithçka në këtë rast është kronike e një ngjarje të paralajmëruar, me autorë Sali Berishën dhe Lulzim Bashen, i pari në sulm dhe i dyti në mbrojtje!

Ndonëse konflikti në selinë e Partisë Demokratike me datën 8 janar u pa nga e gjithë dynjaja nëpërmjet kamerave të dhjetëra televizioneve nga të gjitha këndet, disa studio televizive të Tiranës me të ftuarit e tyre, vazhdojnë të na i servirin ato ngjarje dramatike sikur të kishin ndodhur në fshehtësi të plotë! Turp i madh, po na fyejnë edhe minimumin e inteligjencës! Gjithçka ka të bëjë me atë maskaradë u pa mjaft qartë ditën për diell, duke i shtuar kështu Shqipërisë edhe një marre tjetër në historinë “demokratike” të 31 viteve te fundit!


Mjerisht drejtues emisionesh, gazetarë dhe analistë na qenkan çuditur me këtë ndodhi, ndaj dhe po rropaten nga njëra studio në tjetrën duke tjerrë dokrra! Duhet pohuar hapur e vërteta se konflikti i zhvilluar me datën 8 janar në selinë e Partisë Demokratike, ka qenë një kronikë e një ngjarje të paralajmëruar krejt qartë dhe pa ekuivokë si në dritën e diellit, shumë ditë më parë!

Kthejeni memorien në 10 ditëshin e fundit të muajit dhjetor dhe do të gjeni ultimatumet e përditshme të Sali Berishës që deklaronte se Lulzim Basha ka afat të lirojë selinë e PD deri më 5 janar, pas kësaj date do të jenë 44 mijë anëtarët e PD-së që votuan në referendumin e 18 dhjetorit, ata që do të bëhen përmbarues të vendimit për të marrë selinë nën kontroll! Kthejeni memorien e 10 ditëshit të fundit të dhjetorit dhe do të gjeni se Sali Berisha paralajmëroi që, nëse Lulzim Basha nuk e liron selinë deri me 5 maj, më 8 janar do të zhvillohet protestë kombëtare tek selia e PD-së ku do të hapen dyert e saj dhe se Lulzim Basha do të nxirret jashtë me pekule! Kthejeni memorien e 10 ditëshit të fundit të dhjetorit dhe do te gjeni se si Lulzim Basha kundërpërgjigjej se do të merren të gjitha masat për ta mbrojtur me çdo kusht selinë e PD-së! Kthejeni memorien e ditëve të para te vitit te ri dhe do të gjeni se si Lulëzim Basha deklaronte se po kryhen disa punime në mjediset e brendshme të selisë së PD-së!

E jo vetëm kaq por gjithashtu deklaronte prerazi se janë marrë te gjitha masat për ta mbrojtur selinë e PD-së, nëse do të tentohej të sulmohej nga protestuesit, dhe se nuk do të arrijnë që ta marrin! Pra nga Berisha është paralajmëruar hapur dhe me data të caktuara se çfarë do të kërkohej nga jashtë selisë së PD-së dhe si do të veprohej për ta arritur qëllimin, ndërsa nga Basha vinin reagimet se si do të veprohej nga brenda selisë së PD-së për ta mbrojtur nga sulmuesit e jashtëm!

Atëherë çfarë ka për tu çuditur këtu kur kronikën e 8 janarit të shëmtuar në selinë e Partisë Demokratike e kishin shkruar paraprakisht dhe publikuar në media vete dy njerëzit më të rëndësishëm të kësaj partie, që përfaqësojnë dy anët e konfliktit, Sali Berisha dhe Lulzim Basha! Pse i bien anash e anash gazetaro- analisto- opinionistët dhe nuk merren drejtpërdrejt me këta dy njerëz që gatuan historinë tragjikomike të 8 janarit në partinë e tyre?

Berisha dhe Basha janë “ujku”, ndërsa në studiot televizive u bien tam- tameve të gjurmëve! Tek këta dy njerëz fillon dhe mbaron analiza e tragjikomedisë së 8 janarit 2022 në luftën për të marrë selinë e PD-së, gjithçka tjetër rreth saj është punë përrallash! Është edhe një çështje tjetër shumë e domosdoshme të analizohet dhe kjo ka të bëjë me qëndrimet dhe veprimet e Policisë së Shtetit për këtë ngjarje!

Kjo analizë duke u mbështetur si tek ligji për policinë ashtu dhe tek ligji për partitë politike, pasi me 8 janar u pa sheshit se si lidershipi i një force politike shumë të rëndësishme, udhëheqë zgjidhje me vetëgjyqësi!!!!! Por para analizës për policinë në ketë rast, më parë duhet të analizohen Berisha dhe Basha si skenaristët kryesorë të tragjikomedisë skandaloze të 8 janarit në selinë e Partisë Demokratike të Shqipërisë! Çdo devijim nga kjo analizë, nuk bën gjë tjetër veçese errëson të vertetën e 8 janarit! Fatkeqësisht, këtë devijim po e bëjnë qëllimisht disa media me “qit e prit”,”jo e lagu, jo se lagu”, ndërkohë që gjithçka në këtë rast është kronikë e një ngjarje të paralajmëruar me autorë Sali Berishën dhe Lulzim Bashen, i pari në sulm dhe i dyti në mbrojtje! /Publikuar në Facebook nga Musa KURTULAJ, gazetar/

Open

Close