OPINION – Mbyllja e rrugës së Rinasit për veriorët dhe një postim i ministres Bilali në ditën e lirimit të pedonales në Shkodër

Ditën e sotme ARRSH- Autoriteti Rrugor Shqiptar njoftoi një tjetër lëvizje që shkon në dëm direkt të veriorëve, duke nisur nga Vermoshi deri në Fushë- Krujë. Rruga e Rinasit bëhet me një kalim, nga Qafë Kashari në drejtim të aeroportit të vetëm të sigurtë në vend, atij të Rinasit. Sepse aeroporti i Kukësit dihet tashmë si funksionon.

Në pamje të parë, është thjeshtë dhe vetëm një aks rrugor kombëtar që bëhet i kalueshëm vetëm në një krah. Ky bllokim, bëhet për një “qëllim të mirë”, për të mundësuar që udhëtarët të mos rrezikojnë për të kapur linjat e fluturimeve në orarin e caktuar. Po për cilët pasagjerë bëhet fjalë? Ata për të cilët “kujdeset” shteti, janë shqiptarët e “kategorisë së parë”, ose ata që jetojnë nga Tirana e poshtë e hartës së Shqipërisë. Për të tjerët, ata nga Vermoshi në Fushë- Krujë, nuk ka problem sepse ata janë qytetarë të “kategorisë së dytë”.


Veriorët duhet të kalojnë nga Fushë Kruja- Vora- Qafë Kashari- Aeroport. Për këta, nuk ka shumë rëndësi nëse e humbasin avionin, edhe pse u zgjatet rruga dhe me shumë mundësi, mund të ndeshin në trafik në zonën ku do të kalojnë. Por kjo është njëra anë e medaljes. Përveç zgjatjes së rrugës drejt Rinasit, veriorëve u rritet e kostoja e transportit. Ajo do të reflektohet në rritjen e çmimit të biletave të transportit privat e publik (nëse ka mbetur!) por edhe të vetë xhepit të atyre që kanë mjete private.

Zyrtarisht zona më e varfër e vendit, barra e shpenzimeve të veriorëve do të rritet akoma, a thua se banorët e Veriut e përdorin më pak rrugën drejt aeroportit. Në fakt, një masë e tillë e ARRSH- së që bëhet efektive pas 48 orëve, rritja e telasheve e shpenzimeve, duhej të nxiste reagimin e deputetëve të Veriut. Të paktën atyre që vijnë nga radhët e opozitës. Është dëmtim i drejtpërdrejtë i ekomonisë familjare jo vetëm të atyre që i kanë votuar por edhe të tjerëve që mbështetën me votë qeverinë.

E ndërsa po lundroja në internet, u përballa me një status të ministres së vetme nga Veriu, deputetes së Shkodrës Edona Bilali. Pikërisht në ditën kur hapësirat publike të pedonales “Kolë Idromeno” po liroheshin nga zaptuesit, me apo pa hyqmin e pushtetit vendor, pikërisht në ditën kur ARRSH njoftonte një tjetër vështirësi ekonomike dhe të lëvizshmërisë për veriorët, Bilali gjen kohë për të bërë politikë.

Siç mund ta konstatoni vetë në atë çfarë vetë ajo ka publikuar në Facebook ministrja Bilali, përpiqet ti tregojë “qytetarëve shkodranë që kanë mbështetur Partinë demokratike ndër vite, ti përgjigjen këtyre pyetjeve”, të cilat mund ti lexoni vetë më poshtë. Ndërsa “pyetja” e parë është thjeshtë e qartë propagandë, Bilali në “pyetjen” e dytë ndalet pikërisht tek thelbi: Pjesa ekonomike e gjësë!

I kujton “koston që i ka kushtuar” qytetit zënia e hapësirës publike për shkak të pamundësisë për të zhvilluar aktivitete në këtë zonë. Për hir të realitetit, në këtë zonë janë zhvilluar aktivitete, edhe politike. Madje në sa raste, edhe me praninë e ambasadorëve të rëndësishëm në vend. Përtej kësaj, po ia marrim të mirëqenë arsyetimin e saj.

Shkodra ka humbur (sipas saj) shumë para. Por qytetarët shkodranë e dhanë opinionin e tyre me 6 mars, edhe për çeshtjen që i referohet ministrja. Mbase përgjigje jo e këndshme për Bilalin, por e dhanë me votë. Gjatë atyre ditëve të fushatës, si drejtuese politike, ministrja kishte të gjitha hapësirat, edhe mediatike, të përdorte si argument pedonalen “Kolë Idromeno” për të bindur shkodranët të votonin alternativën që ajo përfaqësonte.

Ndërkohë, sot, do të ishte në dinjitetin politik të ministres të shkruante dy rreshta për ndalim- qarkullimin e veriorëve në rrugën e Rinasit, pa kaluar më parë nga Tirana. E kjo masë e ARRSH- së dhe qeverisë pjesë e të cilës është edhe Bilali, rëndon direkt në xhepat e banorëve të Veriut. Dhe nuk bëhet fjalë “për aktivitete të munguara” por për “para të thata” që dalin nga xhepat e qytetarëve të Veriut të Shqipërisë.

Nëse është dakort me këtë nismë, të paktën të shpenzojë disa rreshta për ti bindur, të paktën në rrjete sociale, se “është për të mirën e veriorëve” të bllokohet rruga e Rinasit nga Fushë Kruja. Mbase ndokush edhe mund të bindet se është për të mirën e banorëve të Veriut të vendit. Se nuk po flasim për investimet që duhej të vinin në fund të vitit të parë të mandatit të tretë të PS- së, i cili duhej të ishte “mandati i Shkodrës” (e treta, e verteta!). Të paktën sipas kryeministrit Rama por edhe ministres Bilali.

Nëse synimi i nismës së ARRSH- së dhe qeverisë është rritja e fluksit të pasagjerëve drejt aeroportit të Kukësit, kjo është tjetër gjë… Po ta thonë dreqi e mori! Po hedhim “turr-a-jaz” jetën në tokë, çfarë ndryshimi ka ta provojmë edhe në ajër, më pas edhe në det…?! Për ata që kanë nevojë për avion, të paktën nga Shkodra dhe disa zona të tjera, Podgorica nuk është larg dhe me çmime më të mira se Rinasi! Me këtë rast “ndihmojmë” edhe ekonominë e Malit të Zi sepse Shqipëria nuk ka nevojë për lekët e shqiptarëve nga…Veriu! /Nga Blerti DELIJA/