Si qytetar i Shkodrës mbrëmë ndoqa mbledhjen e Këshillit Bashkiak në sallë. Ishte një mbledhje për tu harruar. Mbledhja filloi në mënyrë krejt normale po ndihej tensionimi në ajër…
Rregullorja u shkel disa herë nga të gjithë palët ndërsa fjala e Kryetarit ishte jashtë rendit te ditës. Kur miratohet rendi i ditës, flitet vetëm për ato tema e ndër to që u miratua për tu diskutuar, ishte plani buxhetor afatmesëm 2025- 2027 dhe buxheti 2025.
Kryetari i bashkisë foli për investime që do bëhen në Veriun e Shqipërisë (që janë të rëndësishme) por që nuk kanë lidhje me buxhetin e bashkisë, janë jashtë funksioneve që ka qeverisja vendore si dhe jashtë kompetencave të vendimmarrjes së Këshillit Bashkiak.
Këtu filloi çdo gjë deri sa mbledhja u pezullua për të rifilluar pa praninë e Kryetarit të bashkisë, i cili në mbledhjen më të rëndësishme të vitit, zgjodhi të mos jetë prezent.
Këshilltarve u lejohet të jenë politikë, sepse janë zgjedhur me lista politike (ndonëse sa më pak të jenë, aq më mirë) por kryetarit të ekzekutivit jo (ose sa më shumë, është aq më keq).
Manteli politik i veshur së fundi si drejtues rajonal i fushatës elektorale, ka bërë që retorika politike në këshill të mbizotërojë frikshëm. Në fund, buxheti u miratua pa prezantim, pa pyetje, pa përgjigje dhe pa asnjë debat e sqarim.
Buxheti i bashkisë Shkodër për 2025 është 29 milion euro ku investimet janë vetëm 12% e këtij buxheti. Aferim! /Nga Fatlum NURJA, ish- zëvendëskryetar i Bashkisë Shkodër, ish- këshilltar bashkiak/
