Sot Sali Berisha nuk është asgjë në 31 vitet e ekzistencës së Partisë Demokratike. Sidomos pas Kuvendit Kombëtar të 18 dhjetorit, çdo gjë që lidhet me të është zeruar. Të paktën sipas PD- së që ka nisur të quhet rëndom zyrtare. Arsyeja? Sepse për 8 vite nuk ka lejuar Lulzim Bashën të udhëheqë PD- në, duke dënuar demokratët vit pas viti me humbje të njëpasnjëshme, në të gjitha përballjet politike, kauzat e ngritura e kurrë të përfunduara me sukses, çadrat e protestat, marrëveshjet e fshehta me shtrëngime duarsh para kamerave.
E shkuara e PD- së duhet fshirë. Në letër me gomë e në histori me harresë apo mohim. Sali Berisha jo vetëm është e keqja më e madhe e PD- së për 31 vite, por është edhe “gogoli” që duhet hequr nga rruga drejt…të ardhmes.
Kjo është qasja që po u imponohet demokratëve. Të gjithëve, duke nisur nga teserat e 1990- ës, të cilat mund edhe të mës konsiderohen të vlefshme për të votuar në PD. Edhe teserat e viteve kur PD me Berishën qeverisën këtë vend. Madje edhe teserat me firmën e Lulzim Bashës si kryetar që i mbajnë ata individë që nuk e identifikojnë Berishën si e keqja që duhet lënë pas.
Praktikisht, 18 dhjetori është viti zero për Partinë Demokratike. Nuk guxohet të flitet për themelim sepse ai ndodhi me Berishën në 1990- ën. As pë rithemelim sepse procesin e inicioi sërish…Sali Berisha në 2021- in. Pra i bie një parti e re. Pak a shumë siç e përdor Europa të paktën, matjen e kohës në rang mijëvjeçarësh: Epoka para Krishtit, epoka pas Krishtit.
Në fakt, ky proces paska nisur që herët, në sytë e të gjithëve por vetëm sot po e vëmë re. Logoja e PD- së sot, nuk është ajo e 1990- ës. As edhe vula, normalisht as selia. Për antarësinë, nuk ka indikacione edhe pse jo të gjithë mund të kenë të drejtë vote edhe pse kanë teserën e PD- së. Kështu deklaroi sot numri 2 i kësaj partie.
E shkuara e PD- së duhet fshirë sepse lidhet me Sali Berishën. Por e shkuara ka edhe të tjerë personazhe, edhe nga ata që Basha ka sot në krah. E ku po fshihet e shkuara, në një vend që akoma pas 31 viteve, ka ithtarë të diktatorit, madje edhe në rradhët e “elitës” së Kombit, deputetëve. Ku pas 31 viteve, akoma jemi krenarë për “veprat e partisë” edhe pse të gjitha u ngritën me mundin, djersën, gjakun asnjëherë të paguar të mijëra shqiptarëve. Ku pas 31 viteve, partia trashëgimtare direkt e Partisë së Punës (Komuniste), fitoi mandatin e tretë radhazi pasi i ka shijuar edhe dy të tjerë më herët.
A mund të ketë të ardhme një parti politike që fshin të shkuarën e saj? Aq më shumë në një sistem demokratik? Duket e vështirë të besohet por në kuadër të ekspertimenteve që nuk i janë ndarë asnjëherë këtij vendi, mbase duhet ta provojmë edhe këtë.
Dakort! Lidershipi aktual “i ndriçuar” ka zgjedhur një shteg për të udhëhequr partinë. A duhen pyetur ata që konsiderohen bashkëaksionerë, antëtarët e Partisë Demokratike? A ia ka borxh Lulzim Basha një referendum antarëve me një pyetje të thjeshtë: A do ta fhsijmë historinë e 31 viteve të shkuara të Partisë Demokratike meqë është e lidhur me Sali Berishën? Besoj se po. Më së paku, këtë borxh ia ka demokratëve. Të paktën, atyre që u njeh teserat që kanë në xhep.
Edhe për interesin e vetë Lulzim Bashës në fakt. Sepse mund të vijë një moment që ke vulë, seli, logo por nuk ke…antarësi që të të ndjekë pas, që të të votojë. Atëherë do të jetë shumë vonë për të rikuperuar atë që ka humbur. Gjithmonë nëse synimi është forcimi i PD- së dhe ardhja e saj në pushtet në këtë vend. Nëse “agjenda” është tjetër, asnjë rresht më sipër nuk ka vlerë. /Nga Blerti DELIJA/
