Me 15 korrik 2016, presidenti i Turqisë Rexhgep Taip Erdogan, identifikoi një “grusht shteti” që kërkonte ta përmbyste nga pushteti. Nga ajo ditë e deri më sot, pasojat vazhdojnë të ndjehen, me të burgosur, shkarkuar nga puna dhe masa të tjera të privimit të lirisë. Janë mijëra “të implikuar”, ndërsa u identifikua si “fajtori” kryesor, ish- aleati i ngushtë, sot armiku numër 1, Fetullah Gylen.
5 vite më pas, Edi Rama, i cili publikisht e më shumë se një herë, e konsideron presidentin turk më shumë se një mik, u nis të kopjonte me idenë e “gushtit të shtetit” idhullin e tij. Skema është mjaft e ngjashme, po të mendosh se “grushtit i shtetit” i dështuar (tamam si në Turqi në 2016- ën), duket se u ideua nga “brenda”.
Në rrjete sociale dhe media, po qarkullon një listë me të punësuar në ALBcontrol, ku një pjesë e të punësuarve në “vende pëllumbash”, të të afërm, vëllezër, bij e krushqi të pushtetmbajtësve të sotëm. Natyrisht, jo të gjithë, pasi “vende pëllumbash” nga edhe nga krahu tjetër. Por sigurisht, VIP-at afër pushtetit të sotshëm, kanë patur informacion për “grushtin e shtetit” që po përgatitej në Rinas, mu nën “hundën” e tyre.
Ateherë, pse nuk njoftuan “liderin suprem” direkt apo përmes të afërmeve të tyre?! Mos vallë “grushti i shtetit” po përgatitej nga brenda “familjes” apo kishte ndonjë synim tjetër?
Në fakt, numri 2 i PS- së “de facto” Erion Veliaj, e zbuloi vetë se çfarë kishte ndodhur dhe pse. Nuk po kërkohej marrja e shtetit (sepse ushtria, ndryshe nga Erdogani, “nuk u përfshi”) por “sabotimi i veprave të mëdha” të kryeministrit si ardhja e vaksinave, transporti i të sëmurëve me avion, ardhja e të vdekurve nga jashtë etj.
E sot, Rama shkoi edhe përtej me togfjalëshin “partia e kontrollorve ajror”. Nuk është e vështirë të kuptohet se kryeministri kërkonte një “temë” tjetër për t’ ia hedhur opinionit publik. Nuk ka dyshim se skenari i “grushtit të shtetit” u sajua nga vetë brenda familjes. Po cili ishte synimi? Të tregonte se nuk ka “vështirësi” që e e gjunjëzon kryeministrin, të tregonte përsëri se “e keqja e këtij” vendi është opozita dhe faaap, u prodhua një spot elektoral pikërisht me këtë tematikë, duke ftuar shqiptarët të mos i votojnë Berishën e Metën, ndërsa Basha është “kukulla” e tyre.
Brenda pak orëve u demontua “grushti i shtetit”, Rama rezultoi “triumfator” tamam si Erdogani dhe …shqiptarët e “hëngrën sapunin për djathë”. Po pse kaq budallenj i di shqiptarët kryeministri i këtij vendi?! Po sikur të kishin qenë të papunë, nuk do të ishte organizuar kaq shpejt ardhja e kontrollorëve turq të ajrit, të futen në një sektor delikat të sigurisë kombëtare (siç e proklamon prej ditësh vetë Rama), pa kaluar asnjë lloj testi sigurie sepse për aftësinë e tyre, është garant Erdogani ynë.
Në mungesë të një programi të qartë për t’ja paraqitur shqiptarëve, Edi Rama po bën opozitën e opozitës, duke harruar se ka 8 vite në pushtet, i kënaqur që po kalon nga “fitorja në fitorje”. Më e fundit, “dështimi” i të ashtëquajturit “grusht shteti” në Rinas nga kontrollorët e ajrit, një pjesë e mirë e të cilëve janë pjesë e “Bllokut” të tij. Sespe me pagat dhe trajtimin që kanë, afër aeroportit qenka krijuar e funksionin një “Bllok” i ri, ekzistencën e të cilit shqiptarët e mësuan 30 vite pas shembjes së atij në mes të Tiranës. /Nga Blerti DELIJA/
