Vetëm budalla nuk ndryshon! Kjo është aksioma njerezore, autori i të cilës nuk dihet por është pranuar pa patur nevojë për vërtetim matematikor pasi e ka vërtetuar ekzistenca e shoqërisë njerëzore vetë. Sidomos në politike, kjo shprehje gjen personifikim absolut e po të duam ta ngushtojmë edhe pak, në politikën shqiptare është në “shtëpinë e vet”.
Është temë e ditës dhe as ne nuk i shpëtojmë dot opinioneve, komenteve apo analizave për largimin e Marjana Koçekut nga PS duke dalë deputete e pavarur. Në pamje të parë duket “kapërcim ylberi”, që në fakt, e ka kapërcyer edhe më herët, kur pranoi të futet në listën e sigurtë të PS- së në Shkodër, madje si kryesuese e saj.
Kjo, pasi në 2018 nuk ishte thjeshtë një pjesëmarrëse në protestën e studentëve por zëri dhe figura e tyre, edhe në studio televizive. Në 2025, pranoi të kandidojë në nivelin më të lartë politik si pjesë e mazhorancës dhe qeverisë që anatemonte deri në akuza, madje si e preferuar e kreut të qeverisë Edi Rama. 9 muaj pasi ishte pjesë e kësaj ane të politikës, ajo u rikthye në qëndrimet e 2018, madje duke qenë shumë më shumë kritike, deri në kërkesën për dorëheqje të kryeministrit Edi Rama.
Të jesh deputet i një subjekti politik është fillimisht privilegj por edhe detyrim. Sidomos kur nuk ke arritur natyrshëm në ato nivele, përmes një rrugëtimi partiako- publik. Sigurisht, përzgjedhja e Marjanës si kandidate, nuk ishte thjesht dhe vetëm për ti bërë nder asaj. Synohej që përmes këtij simboli, një vajzë e thjeshtë, e mirëshkolluar, biznesmene në territorin ku jetonte, e promovuar edhe nga organizma të huaj, të ndikonte në shtimin e përkrahjes së qytetarëve, më shqeto, më shumë vota. Në fakt, ftohtë, PS- ja sërish mbeti me 4 deputetë, edhe pse nga 2023- i qeveriste bashkinë e Shkodrës, edhe pse në krye të listës ishte një simbol i brezit të ri.
ShkodraWeb ka qenë një nga mbështetëset më të mëdha të Marjana Koçekut, jo si përfaqësuese e një subjekti politik- këtë rast PS por si një shembull që mbase duhet promovuar në sytë e bashkëmoshatarëve të saj. Paramendohej se do të sillte një model ndryshe, edhe në kuptimin moral të politikës, duke hamendësuar se pas 2018- ës, kishte ndryshuar opinion për mazhorancën e qeverinë, që si studente e përfaqësuese e tyre, nuk i kishte shumë qejf.
Nga ana tjetër, nuk mund të thuhet se Marjana nuk ka patur të paktën informacione qoftë për PS- së, qoftë për mënyrën e funksionimit të politikës në përgjithësi. Rëndom, “ai stan, atë bulmet ka”, është shprehja e 35- viteve për politikën tonë, edhe pse padrejtësisht, duke i futur të gjithë në një thes. “Pesë për besë” ishte parrulla e NeoMalsores, duke vënë mes saj e banorëve të qarkut por edhe asaj e PS- së, një nga vlerat më identifikuese të trevës prej nga vinte.
Paralelisht, me uljen në parlament në shtator 2025, ajo vazhdoi të mbështesë mazhorancën edhe qeverinë publikisht në nismat e saj, një nga rastet më flagrante, shembja e ndërtimeve në Theth. Madje, me gjasë foli pa patur nevojë, pa ia kërkuar kush, teksa mund të zgjidhte heshtjen. Një tjetër rast, ishte ai i 35- vjetorit të PS- së në Shkodër, kur mund të kursehej pak në komplimente për kryeministrin, nëse ishte në fazën e reflektimit që solli vendimin e saj të 14 qershor 2026, kur vetëm 6 ditë pas këtij eventi, deklaroi daljen si deputete e pavarur.
Në fakt, në këtë rrugëtim të përmbledhur, ka diçka që nuk shkon ose akoma nuk ka dalë në dritë e mbase, nuk do të dalë kurrë por mbase mund të hamendësohet, aludohet. Festa e 35- vjetorit të PS- së në Shkodër, ajo që nuk është parë e dëgjuar nga të gjithë edhe pse kanë qenë aty apo e kanë ndjekur “live”, ka qenë pika e fundit që derdhi gotën. E në këtë linjë, aludimi më i mundshëm është ai për zgjedhjet e pritshme vendore të 2027- ës, i paraprirë edhe me ndryshimet në strukturat politike të PS- së në Qarkun e Shkodrës.
Sigurisht, informacioni ekziston, dikush e zotëron, natyrisht edhe vetë Marjana. Zgjedhja për të thënë direkt ose indirekt, për ta kuptuar në reshta apo mes reshtave, është në dorën e zotëruesve. Megjithatë, ecuria e marrëdhënies politike të NeoMalësores me PS- së nga tani dhe të paktën deri në zgjedhjet vendore 2027, do të ndihmojë të kuptohet diçka. Nga publiku, pasi të tjerët tashmë duhet ta kenë marrë mesazhin… /Sokol N. SOKOLI/
