Një muaj e gjysmë nga zgjedhjet e 11 majit 2025 dhe akoma po numërohet e diskutohet për zgjedhjet. Deri tani, numërimi nuk ka treguar deformime të mëdha, me ndikim në rezultat zgjedhjesh mes partive politike, madje as kandidatëve të së njëjtës listë. Paralelisht vijojnë edhe denoncimet e opozitës për manipulim zgjedhjesh, në dy fronte: atë të brendshëm dhe atë të jashtëm.
Teksa përbrenda duket se denoncimet “nuk ngjitin shumë”, në arenën ndërkombëtare u arrit deri tek FoxNews duke e konsideruar Edi Ramën si Ramaduro, përshtatje Maduron e Venezuelës. Në fakt, në rrënjën latine “duro” ka edhe kuptim tjetër, i cili mbase padashjen e autorëve, i rrit vlerat kryeministrit aktual.
Nëse nuk është aftësi, Edi Rama mund të konsiderohet me shumë fat në arenën ndërkombëtare. Mbase, edhe për shkak të lidershipit aktual të opozitës, i cili vazhdon të mbajë mbi shpatulla përcaktime aspak të këndshme ndërkombëtarisht, të paktën nga SHBA dhe nga Britania e Madhe. Nga 2013- a, Edi Ramës duket se po i shdrit ylli në arenën ndërkombëtare, mbase më shumë se brenda vendit.
“Open Balkan”, me gjasë, ishte instrumenti politik që i dha startin e fortë Edi Ramës në arenën ndërkombëtare, sidomos brenda kontinetit “plak”. Thuajse është zyrtarizuar dështimi i kësaj nisme, por qartësisht, ndikoi në faktorizimin politik të Ramës në Ballkan por edhe më tej, në sytë e “të rëndësishmëve” të Europës e më gjërë.
E teksa flitet akoma për zgjedhjet e 11 majit 2025, fati duket se vijon ta ndjekë Ramën. Askush nuk u kujtua të evidentojë se logo që Edi Rama mbante në gjoks, këpucë, kapele apo në aksesorë të tjerë, ishte pikërisht e Samitit të Europës që u mbajt në Tiranë vetëm pak ditë pas zgjedhjeve politike. Shumica u kujtuan kur logo u shfaq në samitin që e ktheu Tiranën për disa orë në kryeqytet politik të Europës.
E vetëm pak orë më parë, ishte Samiti i Natos, me kryeministra e kryetarë shtetesh, deri në nivelin e presidentit amerikan Donald Trump. Sigurisht, si kryeministër, ishte e natyrshme që Rama të ishte i pranishëm. Madje, duke rënë në sy që nga veshja, në foton e parë “familjare” të liderëve. Të gjithë me kostume të errëta, madje edhe kryeministri i Ukrainës në luftë Zelensky, edhe pse pa kollare. Edi Rama me një kostum me ngjyrë të çelur, mes të bardhës dhe grihes.
Deri këtu asgjë për tu shënuar, Edi Rama ka mësuar edhe liderët europianë e botërorë me stilin e tij të veçantë apo “të çuditshëm” të veshjes, nga koka, tek këmbët. Por ky samit, i dha një tjetër bonus, mjaft të rëndësishëm për Shqipërinë por edhe Edi Ramën. Samiti i radhës i NATO-s, ai i 2027- ës, do të mbahet në Tiranë, në Shqipëri. Si për koençidencë, në një intervistë të orëve të fundit, Rama deklaroi se mund të “kalojë pishtarin” e qeverisjes nëse Shqipëria realizon integrimin në BE. Për ata që e kujtojnë, viti 2027 është përcaktuar si i mbylljes së negociatave, duke i hapur rrugën etapës së fundit, miratimit nga parlamentet nacionale të vendeve të BE- së së marrëveshjes së antarësimit të plotë.
E ndërsa banaqet televizive gëlojnë e do të vazhdojnë për javë, ndoshta muaj, të diskutojnë 11 majin 2025, zgjedhjet e kaluara apo ato që do të vijnë, askush nuk e thotë se Edi Rama duhet mundur fillimisht në arenën apo skenën ndërkombëtare. Të gjitha përpjekjet e deritanishme, me sponsorizime apo edhe bamirësi madiatike- politike, kanë dështuar. Vetëm kur të arrihet kjo, mund të nisë diskutimi i mundjes në Shqipëri, me votën e shqiptarëve të Edi Ramës. Shpesh herë, e vërteta nuk pranohet, sidomos kur është e hidhur! /Nga Sokol N. SOKOLI/
