Nga Sokol N. SOKOLI
Dy Kuvende Kombëtare, të dyja të Partisë Demokratike, janë thirrur në një hark kohor 1 javor. Ndryshon vetëm mënyra e thirrjes së tyre. I pari, ai i datës 11 dhjetor 2021, është thirrur nga antarësia e delegatëve, bazuar në statutin e PD- së. Për hir të realitetit, ka një vakuum lidhur me procedurat që duhen ndjekur kur Kuvendi Kombëtar thirret nga 1/4 e delegatëve. Ka hapësirë për interpretim, si nga ata që janë pro por edhe kundër “11 dhjetorit”.
I dyti, vetëm një javë më pas, me 18 dhjetor 2021, është thirrur sipas statutit nga Kryesia e PD- së me propozim të kryetarit të partisë. Ajo që është e qartë dhe me shumë mundësi do të verifikohet është se dy Kuvendet përjashtojnë njëri- tjetrin.
Fakti që statuti i PD- së nuk parashikon imtësisht procedurën se si veprohet kur Kuvendi thirret nga 1/4 e delegatëve, shkon në favor të thirrësve të tij. Kjo në bazë të parimit të jurispridencës që “ajo që nuk ndalohet, lejohet”. Nuk është e qartë vendimmarrja që do të ketë Kuvendi Kombëtar i 11 dhjetorit, por e sigurtë është se ai, me statutin aktual, nuk mund të shkarkojë kryetarin e partisë të zgjedhur me parimin “1 antar, 1 votë”. Ideja e ndryshimit të statutit nga ky Kuvend dhe zbatimi i menjëhershëm i tij, edhe pse ka precedentë se kështu edhe ka ndodhur, në rastin e kryetarit aktual të PD- së, vështirë të zbatohet. Pra, të Kuvendi Kombëtar të marrë vendim për shkarkimin e Lulzim Bashës sepse do të ishte jo vetëm hakmarrje por miratim normash statutore për të goditur një individ. Kjo shkon kundër të gjitha parimeve të jurisprudencës në një shtet demokratik.
Nga ana tjetër, Kuvendi Kombëtar ka të drejtë të shkrijë të gjitha organet e tjera kolegjiale, ti shkarkojë dhe të emërojë apo zgjedhë të reja. Pak a shumë, ka fuqinë si organi suprem i partisë, të bëjë nul Këshillin Kombëtar, Kryesinë dhe të gjitha sekretariatet. Pavarësisht se në statut parashikohet se zgjidhen apo emërohen nga të tjera organe, siç është Këshilli Kombëtar apo Kryetari, Kuvendi Kombëtar mund të vendosë ti ushtrojë vetë, direkt, të gjitha këto kompetenca. E nëse ndodh kështu, mund të konstituohet një Këshilli Kombëtar i ri, një Kryesi e re dhe kryetar do të vijojë të jetë aktuali. Logjikisht, kryetari aktual mund të shkarkohet vetëm përmes zgjedhjeve të reja të shpallura (që askush nuk e pengon Kuvendin Kombëtar ti shpallë) ose përmes një referendumi për të gjithë antarësinë e PD- së.
E nëse do të ndodhte kështu, atëherë Kuvendi Kombëtar i 18 dhjetorit nuk do të kishte asnjë bazë statutore për tu mbledhur. Gjithmonë, nëse një javë më parë, Kuvendi Kombëtar i 11 dhjetorit do të verifikohej si i ligjshëm, me kuorumet e nevojshme vendimmarrëse dhe me vendimet e sipërpërmendura. Gjithsesi, dy Kuvendet Kombëtare, me dokumentacionet përkatëse do të përfundojë për certifikim në Gjykatën e Shkallës së Parë Tiranë. Një gjykatës do të duhet të marrë vendim për regjistrimin e dokumentacionit, ligjshmërinë e proceseve dhe përfshirjen e akteve në dosjen e PD- së në Gjykatën e Tiranës.
