Të nderuar përfaqësues të institucioneve publike,
Po ju drejtohem me fjalën e një malësori dhe me shpirtin e një fermeri që nuk e lëshon tokën e të parëve të vet… Jam banor i kësaj zone, i rritur ndër bjeshkë dhe lugina që kanë qenë gjithmonë gjallë prej djersës së njerëzve të ndershëm dhe punëtor dhe jo prej favoreve nga lart.
Drishti, një nga pasuritë më të çmuara historike të kësaj krahine, që ruan gurë me kujtesë të lashtë ndoshta që nga koha e Labeatëve të lashtë…po tretet në heshtje. Kalaja e tij, që duhet të ishte krenaria e Veriut dhe atraksion kombëtar, sot është lënë në mëshirë të harresës dhe shkurrnajës. E vetmja gjë që është bërë është një rrugë me asfalt që nuk të çon askund sepse asnjë plan serioz për zhvillimin e zonës nuk ekziston…
Ndërkohë, Shllaku dhe Drishti janë gjallë prej punës së palodhur të njerëzve që jetojnë në këto anë… Nuk kam parë as në botën e madhe ku kam shkelur, një popull më të dashur për punën dhe më të lidhur me vendin e origjinës… Mbjellin çdo stinë, jetojnë me tokën dhe e respektojnë atë.
Qepa e Drishtit dhe lakra e kësaj toke kanë shije shumë të mirë si në asnjë vend tjetër në Shqipëri. por për fat të keq, këta njerëz, që janë thesari i vërtetë i vendit, nuk përfaqësohen në politikat zhvillimore të Bashkisë Shkodër.
Ne nuk po kërkoj as mëshirë, as favore. Po kërkojmë të drejtën për të jetu në vendin tonë.
Kërkesat janë të thjeshta dhe të drejta….Të përgatitet një plan konkret dhe serioz për zhvillimin e zonës së Drishtit si atraksion turistik historik dhe kulturor… Të përfshihen fshatrat e Shllakut në programet kombëtare për zhvillim rural, bujqësor dhe rrugor… Të përfaqësohen me dinjitet këto zona në tryezat e vendimmarrjes, jo vetëm si emra në hartë por si realitet që kërkon investim, vizion dhe respekt…
Shllaku dhe Drishti nuk janë për tu harruar. Malësia e Shkodra nuk është për tu anashkaluar. Ne nuk jemi larg…jeni ju që jeni larguar prej nesh. Është koha të ktheheni. është koha të veproni.
Me respektin dhe zërin e një burri që nuk përkulet për të kërkuar të drejtën,
Për Shkodraweb, Nikolin Martin Shqua
Fermer në Fermën e Shën Mhillit,
Fshati Vukaj, Shllak Bashkia Vau i Dejës
Qarku Shkodër
