OPINION – “Drama” e atyre brenda përballë “dramës” së atyre jashtë si alibi për të vijuar “betejën” mediatike për PD- në…

Pak minuta pas mbylljes zyrtare të protestës së 8 janarit para PD- së, nisi ajo që mund të quhet “beteja” mediatike për “dramat” që perjetuan palët përplasëse me 8 janar në oborr dhe brenda selisë blu.

Palët rreken të bindin opinionin publik, duke nxjerrë “prova”, se kush është fajtori i asaj që ngjau. Kjo, sikur jo e gjithë ngjarja, me dhjetra kamera, është transmetuar live. Interesant është fakti se janë të njëjtat filmime, por të shkëputura sipas interesit të palës përkatëse. Për shembull, jepen pamje të vendosjes së shkallëve për tu ngjitur në katin e dytë të selisë por aty ku nis goditja me shkopinj mbi agresorët, video mbaron. Të njëjtën video, pala tjetër e fillon pikërisht në atë moment, për të vertetuar dhunën.


E kështu, publiku, përmes mediave, bombardohet me dy versione krejt të ndryshme të së njëjtës ngjarje. Kjo, a thua se nuk e ka parë gjithë dynjaja atë që ndodhi apo sikur këto ngjarje të kenë ndodhur kur në këtë vend kishte vetëm një media, TVSH.

Pjesa tjetër e betejës mediatike, u besohet protagonistëve, atyre jashtë dhe atyre brenda selisë blu. Cila paraqet “dramën” më të madhe, deri në rrezik jete nga pala kundështare. Përmendet rrezik jete nga goditjet, karriget e tavolinat që fluturojnë nga lart, nga vretë që godasin dyert e deri tek gazi lotsjellës që u hodh masivisht dhe pa kuptim nga policia gjatë mësymjes.

E gjithë kjo ngjan me një film të parë edhe më herët. A e dinte pala brenda selisë se do të tentohej hapja e dyerve, po të doni edhe “pushtimi” i selisë së PD- së? Sigurisht! Ishin paralajmëruar disa herë. Po pse qendruan para rrezikut me moton “në gojë të ujkut hedhim valle”? Pse rrezikuan jetën e tyre, të mbështetësve por edhe atyre që i kishin rrethuar?

Ata që ishin jashtë dhe donin të hynin brenda, a e dinin se do të hasnin në rezistencë? A e dinin se përveç dyerve të blinduara do të duhej të përballeshin edhe me individë jo shumë miqësorë, një pjesë edhe të importuar? Natyrisht që e dinin, por i dolën përballë rrezikut për të treguar vendosmërinë e tyre por edhe për të pohuar publikisht se janë trima.

Palët, pa nisur protesta e 8 janarit, i dinin reciprokisht qasjet që i prisnin. Pra, ishin të vetëdijshëm, edhe për ndërhyrjen e policisë, sapo dikush të kërkonte ndhmë nëse ndjehej i rrezikuar me jetën. Masën e rrezikut, nuk mund ta përcaktojë askush sepse ajo është individale. Një grua shtatzënë brenda selisë, nuk besojmë se ka qenë më e rrezikuar nga gazi lotsjellës se një grua shtatzënë përballë selisë së PD- së.

Të dy palët, të lidhura reciprokisht me shkak- pasojë, janë bashkëfajtore dhe bashkëvuajtëse për atë që ndodhi me 8 janar 2022. Nuk ka peshore, madje as gjykata, që ta përcaktojë se sa gramë faj më shumë apo më pak pati njëra palë. Aq më tepër, kur është një çeshtje e brendshme e vetë demokratëve, më saktë antarë të së njëjtës parti.

Sapunin për djathë, duke treguar gjysmë të verteta, duke e parë të njëjtën gotë gjysmë bosh e gjysmë plot, askush nuk mund t’ia shesë shqiptarëve. Sigurisht, beteja mediatike do të vazhdojë. Por deri në përballjen e radhës mes palëve. Atëherë do të rifillojë aty ku kishte mbetur. /Nga Sokol N. SOKOLI/