”Kam punuar 24 vite në PD. Jam shumë krenar që kam punuar me profesor doktor Sali Berishën. Në 2 legjislaturat e fundit kam punuar me Lulzim Bashën, i jam shumë mirënjohës. Sot (të mërkurën) bëra një largim para kohe sepse nuk më pëlqejnë disa reagime mes demokratësh. Bëni mirë të gjeni gjuhën, mos i bëni qejfin të tjerëve”.
Këto janë pak rreshta të publikuar në rrjete sociale nga Pëllumb Matraku, ai që ndoshta jo me dashamirësi, prezantohet thjesht dhe vetëm si “roja” i PD- së. Pas 24 viteve sherbim në selinë blu, ai ka dhënë dorëheqjen. Të paktën kështu shkruan ai vetë dhe nuk ka arsye për të mos i besuar. Por edhe nëse e kanë larguar apo detyruar “të dorëhiqet”, përsëri me ato pak rreshta, ai i jep një leksion klasës aktuale politike por edhe asaj që mund të vijë nesër.
Me shumë mundësi Matraku është paguar, edhe pse nuk rezulton nominalisht në listpagesat zyrtare të PD- së për muajin prill 2021, edhe ato të publikuara me “skandalin e pagave” që u nxorrën për 20 mijë lekë. Ndërkohë, ai rezulton me pagë minimale, 30 mijë lekë, në listpagesën e muajit janar 2021. Mbase “roja” i PD- së në vijimësi, është paguar CASH ose në ndonjë “mënyrë” tjetër, edhe pse me të njëjtën emertesë, në listpagesën e PD- së janë 4 persona për muajin prill 2021.
Të jetë kjo arsyeja që Matraku u “dorëhoq” pas 24 viteve sherbim në selinë e PD- së? Edhe nëse është kështu, dorëheqja i bën nder atij dhe turpëron lidershipin e PD- së. Sigurisht që paga zyrtare, nuk i ka zgjidhur problemet ekonomike të përditshme por pavarësisht kësaj, ai e ka humbur dhe këtë burim. Por ka patur kthjelltësinë të mos merret me këtë “vogëlsi” por të përcjell një mesazh të vlefshëm edhe për ata që e morën dhe mbajtën në punë për 24 vite.
Natyrisht, Pëllumd Matraku ka qenë demokrat dhe jo vetëm me teserë. Situata aktuale si për shumicën e demokratëve, nuk ka lënë përshtypje pozitive as tek ai. Nuk ka patur shumë në dorë për të ndryshuar situatën, por ka vendosur të japë shembullin e tij personal. Të ikë, të vetëlargohet apo edhe të “dorëhiqet” publikisht. Nuk është marrë aspak me pjesën ekonomike të veprimit të tij, as nuk e ka aluduar atë përmes rreshtave. Ai ka kërkuar të gjendet gjuha për të mos i bërë qejfin të tjerëve. Ai e ka thënë troç se “nuk më pëlqejnë disa reagime mes demokratësh”.
Mesazhi i tij përmes dorëheqjes, është një simbolikë e fortë. Pavarësisht se thjeshtë dhe vetëm një “roje”, pavarësisht se heq dorë mbase nga i vetmi burim ekonomik jetese, kujton se ka një institucion që mund dhe duhet të njihet e të veprojë në disa situata e rrethana: Dorëheqja! Mbase dikush mendon se është mesazh- kerkesë për Bashën, në fakt është në tërësi për klasën politike në këtë vend.
Kam përshtypjen se më shumë i vjen keq, i dhimbset Partia Demokratike “rojes” Pëllumb Matraku se liderëve e ish- liderëve Basha dhe Berisha. Si ai, janë me mijëra në të gjithë Shqipërinë e përtej saj. Këta janë Partia Demokratike e vertetë, ajo për të cilën kanë nevojë jo vetëm demokratët por të gjithë shqiptarët. Mbase dorëheqja e tij është edhe një paralajmërim për atë që mund të ndodhë sot, me 8 janar 2022, në oborrin dhe selinë e PD- së. Pëllumb Matraku refuzon të jetë i përfshirë, të jetë pjesë… /Nga Blerti DELIJA/