“Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojne kufijtë.”
Deputetja e PS- së e Qarkut Shkodër, Marjana Koçeku, kryesuese e listës socialiste, ka dhënë dorëheqjen nga Grupi Parlamentar ku është pjesë nga muaji shtator i vitit të kaluar. Ka shkruajtur shkurt dhe qartë, me pak rreshta por edhe me dilema të mëdha për arsyet reale të kësaj dorëheqje, pavarësisht qendrimeve deri diku kritike, të shfaqura dhe më herët për zhvillimet politike në vend.
Marjana Koçeku nuk kishte fare eksperiencë e angazhim politik. Ishte personazh publik, i evidentuar edhe nga seli diplomatike në Tiranë. E shkolluar jashtë, 25- vjeçarja u rikthye në vendlindje për ti dhënë jetë një bujtine, “NeoMalsore”. Sigurisht, ra në sy edhe të politikës në prag të zgjedhjeve të 2025- ës dhe madje, PS e vendosi jo vetëm në listë të sigurtë por edhe kryesuese liste.
U anatemua mjaft, sidomos për artikulimin gegë, edhe pse në intervistën përballë Edi Ramës në “Flasim”, pa u zgjedhur akoma deputete, të njëjtën qasje kishte lidhur me dialektin e përdorur.
Në këto pak muaj, Marjana tentoi fillimisht të vlerësojë punën e qeverisë dhe mazhorancës socialiste. Me kalimin e javëve e muajve, duke nisur nga rruga e Dukagjinit, ndotja e lumenjve- duke dalë në krah të deputetit të PD- së Kliti Hoti, ligji për barazinë gjinore ku bojkotoi votimin, 25- vjeçarja dha shenja të dukshme të “daljes nga rreshti politik”. Për “dyshimet”, pse tani dhe jo për “Thethin”, “Rrjollin” etj., duhet kujtuar se “gotën e derdh gjithmonë pika e fundit që i hidhet asaj”.
Largimi nga Grupi Parlamentar i PS- së, më shumë se politik, është moral, Sigurisht, shpresohet që në vijim Marjana të japë më shumë informacion për arsyet e vendimit, por ka krijuar reaksion dhe veprimi, sigurisht lidhet me kontekstin e kohës: 15 ditët e protestës në sheshin para Kryeministrisë. Ndoshta është më shumë se kaq, mbase edhe më pak, por ky është “leximi i parë”.
Duke qenë pjesë e listës së sigurtë të PS- së, Koçeku e ka patur të sigurtë mandatin që në momentin e kandidimit. Edhe numri i votave personale të fituara, nuk është më lart se Edona Bilali, për shembull, e cila mbeti pa mandat në 2025. Juridikisht, me zgjedhjen deputete, siç e parashikon Kushtetuta, Marjana nuk ka asnjë detyrim ligjor ndaj partisë që e kandidoi. Por moralisht, ajo e mori mandatin “pa u lodhur shumë”, në dritën e shifrave gjithmonë.
Mandati i Marjana Koçekut në Kuvend, moralisht, është i Partisë Socialiste, për arsyet që thamë më sipër. Por nga ana tjetër, mbase edhe për shkak pikërisht të motiveve të dorëheqjes së shprehura, 26- vjeçarja mund të zgjedhë të bëhet zëdhënëse e idealeve e vlerave të saj, të cilat pikërisht në këtë moment, nuk përputhen me ato të PS- së.
Nga ana tjetër, nga brenda dhe jashtë PS- së, nga brenda e jashtë Shqipërisë, përveç mbështetjes për veprimin e saj, Marjana po përballet edhe me presion që pas largimit nga PS- ja, të dorëzojë me dorëheqje në Kuvend edhe mandatin e deputetes. Kjo mbase është dilema e madhe e vërtetë e saj, pa u mbushur 24 orë nga vendimi i saj. Mos u habisni, çdo gjë mund të ndodhë! Marjana i ka dhënë shenjat se është e paparashikueshme! Për ata që mbase e kanrë harruar, në fushatë Marjana kishte slogan personal “5 për besë”… /Nga Sokol N. SOKOLI/
