Një procesverbal i përbashkët i tre komisioneve të votimit për zgjedhjen e kryetarit të PD Shkodër, grishi dëshirën për të dekriptuar disi, informacionin dhe fenomenet e dukshme dhe të padukshme brenda kësaj strukture politike, shumë e rëndësishme jo vetëm brenda partisë më të madhe opozitare në vend por edhe të vetë bashkisë kryeqendër të Veriut.
7128 anëtarë rezultojnë si të regjistruar në degën e PD Shkodër, të paktën sipas verifikimeve më të fundit të kryesisë lokale të premten e kaluar. U diskutua “pastrimi” i listave për ti bërë sa më reale dhe me të drejtë, për të eliminuar çdo justifikim të mundshëm pas zgjedhjeve, u vendos mos të preken. Siç e kanë deklaruar edhe vetë kandidatët para zgjedhjeve të së dielës, Ardit Çylybyli dhe Gentian Ibro, edhe ata kanë qendër kundër “krehjes” me rreth 300 emra të listës.
Duke gjykuar “ftohtë” dhe matematikisht, në zgjedhjet për kryetar të degës së PD Shkodër, morën pjesë rreth 25% e të regjistruarve si anëtarë me parimin “një anëtar, një votë”: 1781 nga 7128! Edhe brenda PD- së siç edhe jashtë saj, është e sigurtë se kjo përqindje nuk është reale. Zhvendosjet brenda vendit dhe jashtë vendit, me siguri matematike, kanë lëvizur këtë numër, me gjasë duke e pakësuar. Të tjerë mbase, kanë zgjedhur të qendojnë jashtë aktivizimit politik përkohësisht apo përgjithmonë e natyrisht, edhe vitet kanë bërë efektin e tyre me kalimin e kohës e nuk përjashtohet, ndikimi i tyre në saktësinë numerike të listës së antarësisë.
Partitë politike janë bashkime vullnetare të anëtarëve, mbi bazë ideologjike dhe programore. Në raste të shumta, siç ishte edhe kjo e diel, është shumë e rëndësishme që antarësia të jetë reale. Pra, të kenë të drejtë vote vetëm ata që kanë jetë aktive brenda subjektit dhe zbatojnë statutin, duke nisur nga kuotizacioni. Ky i fundit, është zbehur nga viti në vit dhe është thuajse shuar me daljen e PD- së në opozitë edhe në nivelin lokal. Po flasim për antarësinë e thjeshtë, pasi deputetë, të zgjedhur në nivel vendor por edhe kombëtar, vazhdojnë të paguajnë.
Kuotizacioni, nuk është i rëndësishëm vetëm në kuptimin ekonomik por edhe edhe një detyrim- lidhje e përmuajshme, kontribut që të bën të ndjehesh edhe “aksioner” i subjektit politik. Masa e tij, mund të diskutohet, deri në nivele simbolike por të mban të lidhur me subjektin politik.
Selia e PD Shkodër, përgjatë viteve, është hapur përherë e më rrallë. Në kuptimin e plotë e të vertetë të fjalës. Më së shumti, në prag apo gjatë fushatave në nivel lokal ose kombëtar. Realisht, ajo duhet të hapet çdo ditë, të ketë të paktën një njeri- sekretar/e që pret, mban shënime dhe transmeton tek titullari. Është edhe çeshtje ekonomike, pagese, rroge por vetëm kështu mund të nisë të funksionojë si institucion PD Shkodër.
Në nivel lokal, demokratët kanë grupin e tyre në Këshillin Bashkiak të Shkodrës. Një koordinim mes tij dhe lidershipit të ri, kryetarit e Kryesisë që do të zgjidhet në vijim, do të sjellë më shumë efikasitet edhe si opozitë lokale, gjithmonë në funksion të intersit të qytetarëve dhe Bashkisë Shkodër.
Kryetari i sapozgjedhur, Ardit Çylybyli, ka përmendur disa herë “bashkë”, “të gjithë bashkë” për riorganizimin e strukturave. Është vertetë pozitive, aq më shumë kur PD por edhe çdo opozitë në botë, ka nevojë jo vetëm për çdo anëtar por edhe qytetar, pavarësisht bindjes politike. Në këto kushte, “përjashtimi” duhet harruar si koncept, nëse synohet ringritja por edhe lufta reale për të ardhur në qeverisje lokale dhe kombëtare. /Sokol N. SOKOLI/
