Me 8 maj 2026, Partia Demokratike ka njoftuar protestën e radhës, me synim shkurtimin e ditëve të qeverisë aktuale të kryeministrit Edi Rama. Siç edhe e ka pranuar vetë lideri Sali Berisha, rivali i tij politik, pamundëson zhvillimin e zgjedhjeve të lira, të ndershme, të barabarta dhe të pamanipuluara. Për këtë arsye, ai duhet larguar që të ketë zgjedhje të lira, e pas tyre, rotacion demokratik të pushtetit, gjithmonë me votë, edhe pse në një rast, ndoshta lapsus, përmendi edhe “kryengritje paqësore të armatosur”.
Në dritën e zhvillimeve të fundit brenda vetë PD- së në kuadër të përgatitjeve për zgjedhjen e kryetarit të këtij subjekti politik, pikërisht këtu fillojnë analogjitë mes Ramës dhe Berishës. Ndërsa i pari, mundëson zgjedhje, jep para për rivalët për pushtetin politik në vend, i dyti nuk bën zgjedhje, aq më pak të krijojë hapësira për rivalët e tij brenda familjes politike. Të paktën 5 persona: Ervin Salianji, Alesia Balliu, Evi Kokalari, Mereme Sela dhe Vladimir Mulaj, janë penguar të kandidojnë.
Sigurisht, vendimi është statuor nga KOKOE i kryesuar nga Albana Vokshi, homolog i KQZ- së i kryesuar nga Ilirjan Celibashi. Pak a shumë, siç edhe vendimet e KQZ- së në situata zgjedhore në favor të PS- së dhe në dëm të PD- së. Pra, brenda PD- së, Berisha përdor të njëjtin mekanizëm që përdor Rama në nivel republike apo Shqipërie. Madje, KOKOE e tejkalon me mosverpime apo reagime edhe KQZ- në, e cila formalisht merr vendime.
KOKOE e Vokshit, ka patur detyrim shqyrtimin dhe shprehjen me vendim për “Nenin Basha” në Statutin e PD- së. Sipas një pjese të konsiderueshme jo vetëm jashtë por edhe brenda PD- së, pas humbjes së zgjedhjeve politike të 2025- ës, njohjes së tyre përmes futjes në Kuvendin e dalë pas tyre, Berisha duhej të jepte dorëheqjen. Jo vetëm kaq, atij duhej ti pengohej edhe rikandidimi në zgjedhjet e menjëhershme të parakohëshme. KOKOE nuk e shqyrtoi e nuk mori vendim, ashtu siç edhe Komisioni i Etikës i Adriana Kalasë. Madje, as tani kur e kanë dyfish detyrim verifikimin e kandidaturës së vetme të Sali Berishës për kryetar të PD- së. Qartazi, “Neni Basha” është kriter pengues për kandidimin dhe KOKOE e ka detyrim të bëjë konstatimet e nevojshme: Berisha nuk mund të jetë kandidat, madje nga shtatori i vitit të kaluar, nuk është as kryetar legjitim i PD- së.
Të gjithë këto rreshta, fare thjeshtë shumëzohen me zero me vetëm një fjali: Pse shqetësoheni ju, janë probleme të brendshme të PD- së, e di ajo si i trajton dhe i zgjidh! Por sigurisht, me të njëjtin cinizëm mund të shtrohet edhe pyetja: Pse shqetësoheni ju për zgjedhjet në Shqipëri, janë probleme të brendshme të PS- së, të cilën shqiptarët e votojnë për të katërtën herë radhazi!
Për t’ju kundërvënë Edi Ramës dhe PS- së, Sali Berisha dhe PD- ja duket se po zgjedhin tashmë të njëjtin model si kundërshtari. Me gjasë, konsiderohet i suksesshëm dhe kopjimi mund të të drejtojë drejt suksesit. Edhe pse, ai që e ka “shpikur” këtë model, është të paktën një hap përpara atij që e ndjek! Shkurt dhe shqip, me të njëjtin model që Rama përdor për të qendruar në pushtet në Shqipëri, të ngjashmin e përdor Berisha për të mbajtur PD- në dhe lidershipin e opozitës. /Nga Sokol N. SOKOLI/
