Nuk është e lehtë të përfshihesh në opinione në fund të një realityshow, fituesi i të cilit shpallet nga “vota popullore”. Nuk është e lehtë për shumë arsye por kryesorja, rrekesh ti kundërvihesh publikisht një mase të gjërë njerëzish, të cilët tek një individ, jo domosdoshmërisht duhet të fokusohen tek vlerat, aq më tepër kur bëhet fjalë për një “lojë”, siç konsiderohet BBVip.
Megjithatë, “sëmundja profesionale” tashmë mbizotëruese, të bën të “rrezikosh” edhe duke iu “kundërvënë” shumicës së votuesve, meqë jemi edhe në fushatë zgjedhore politike. Sepse ka një postulat, “populli nuk gabon kurrë” në zgjedhjet e veta e kjo, mbase mund të vlejë edhe një një “lojë televizive” live, siç konsiderohet ky realityshow 120 ditor.
Gjykimi është gjithmonë individual por kthehet në kolektiv, përmes mekanizmit të votës. Por edhe kjo e fundit, nëse nuk është e verbër, duhet të mbështetet apo justifikohet mbi disa kritere. Sa kritere plotësoi në këtë lojë Gjesti, për të merituar shumicën e votave të shqiptarëve, këtej e andej kufirit, madje edhe në Diasporë.
Në pamje të parë, ka një ngjashmëri edhe fushatën apo fushatat elektorale në Shqipëri këto 35 vite se më herët, vështirë të flitet për koncept zgjedhjesh në këtë vend, sidomos nga 1944- 1991. Të gjithë jemi të ndërgjegjshëm se jo përherë ka fituar më i miri, ai që më pas, ka bërë atë që ka premtuar ose i ka tejkaluar premtimet e dhëna. Por populli, asnjëherë nuk gjykohet, nëse do të marrim me rezerva akuzat e përhershme për vjedhje, manipulim të zgjedhjeve.
E duke u rikthyer tek fituesi i BBVip, a mund të konsiderohet Gjesti një i ri model, që duhet stimuluar e promovuar, të paktën si përfaqësues i brezit të tij, kudo ku jetojnë shqiptarët? Besoj se pjesa më e madhe, bien dakort se ai është nën nivelin mesatar të formimit edhe si njeri, të brezit të vet në Kosovë, Shqipëri e kudo ku frymohet shqip.
Ai e shfaqi veten në të gjitha dimensionet, si në marrëdhëniet me një vajzë brenda BBVip, në raportet me të tjerët dhe “kulturën e përgjithshme”, nëse mund të flasim për një të tillë tek ai individ. Natyrisht, mund të justifikohet edhe me “strategjinë e lojës”, por në këtë rast, i bie se publiku i gjërë, ra në grackën e ngritur nga një individ nën nivelin mesatar të shoqërisë shqiptare në përgjithësi. Pra, u manipulua, fiks siç ka ndodhur e mund të ndodhë, edhe në zgjedhjet politike në Kosovë, Shqipëri e kudo ku kanë të drejtë të votojnë shqiptarë.
Në fund, edhe disa fjalë për median që organizon këtë realityshow. Koncepti i “edukimit të audiencës” ekziston ligjërisht vetëm për RTSH, transmetuesin publik në këtë vend, siç besoj edhe për RTK në Kosovë. Të gjitha mediat e tjera jopublike, janë të prirura nga audienca, rritja e saj. Ky edicion i BBVip do të mbahet mend si i dhunës, e cila shpesh herë nga verbale, kaloi në fizike. Kjo me gjasë, rriti ndjeshëm audiencën e këtij programi televiziv. Automatikisht, kjo përkthehet në më shumë reklama, në më shumë të ardhura financiare.
A është morale e gjithë kjo? Është një temë e dalë thuajse jashtë mode dhe çdo pyetje e tillë, rrjedhimisht edhe përgjigje, mund të ngjallë nga të qeshurat, deri tek irritimi. Në fund, edhe këto rreshta tingëllojnë demode. Teksa “populli” ka gabuar e mund të gabojë me zgjedhjen e tij edhe kur i kërkohet të votojë për veten, të ardhmen e tij dhe të pasardhësve. Çfarë vlere ka të komentohet për qasjen e “popullit” në një lojë?! Në fund të fundit, simbolet në të gjithë botën, pjesa dërrmuesee tyre, janë shumë imazh (formë) dhe aspak përmbajtje. Pse ne shqiptarët duhet të bëjmë përjashtim?! /Nga Blerti DELIJA/
