Kryeministri Rama ka paralajmëruar përsëri një aksion kundër ndertimeve pa leje në zonat turistike. Data sot shënon 15 maj, ndërsa me 10 qershor 2020, nisi aksionin një vit më parë në Velipojë, pasojat e të cilit dihen.
Janë të paktë ata që mund të mbrojnë ndërtimet pa leje. Përveç se shëmtojnë territorin, zonë turistike ose jo, favorizojnë edhe konkurrencën jo të ndershme. Që territori duhet të mbahet nën monitorim të fortë, askush nuk ka dyshime.
Por natyrisht, duhet gjetur koha e përshtatshme. Në fakt, shteti e ka detyrë të gjejë kohën e përshtatshme. Për shembull, nga janari i këtij viti, deri me 25 prill, mund të ishte afati i përshtatshëm. Ose, nga fundi i sezonit, që edhe sivjet mbetet 15 nëntori, shteti me kostumin e IMKT- së, mund të ndërhyjë edhe në zonat turistike.
Periudha e parë, nga janari deri me 25 prill, ishte e papërshtatshme. Sepse qeveria do të merrte një rezultat edhe më të dobët se mori, jo vetëm në Shkodër, por kudo ku do të shëmbte ndërtimet pa leje. Por edhe periudha e dytë, është e papërshtatshme. Më saktë, është pak larg për të eklipsuar jehonën e zgjedhjeve të 25 prillit, të cilat sipas opozitës dhe jo vetëm, kishin mjaft probleme. Për të tërhequr vëmendjen, duhet diçka e madhe që të marrë interesin e mediave dhe opinionit. Skema, veçse përsëritet. Duhet një temë e re për të fashitur të vjetrën.
Edhe sivjet është turizëm “pandemik”. Edhe pse është thënë se çdo gjë do të hapet, akoma nuk ka ndodhur. Madje në disa zona, si Velipoja, akoma nuk janë caktuar stacionet e plazhit, të cilat sivjet, do të jepen në zotërim për 5 vitet e ardhshme, tha ministri i Turizmit Blendi Klosi.
Nga ana tjetër, ka nisur e po vijon promovimi i turizimit. Janë rreth 1 milion USD që janë akorduar nga qeveria për këtë synim. Edhe aksioni i një viti më parë tregoi se, pavarësisht propagandës, më i dëmtuari doli plazhi i Velipojës. Imazhi i fadromave që shembnin ndërtimet, i përplasjeve të banorëve me IMKT- në e policinë, përcolli pjesën dërrmuese të turistive shqiptarë e të huaj drejt Jugut të vendit. Velipoja mbijetoi dhe për të siguruar të ardhurat e munguara, bizneseve turistike iu mbeti vetëm një rrugë: rritja e çmimeve, e cila rëndoi xhepat e shqiptarëve që e zgjodhën. Por përsëri, çmime shumë më të ulëta se të Jugut. Sepse qetësia është ajo që zgjedhin të parën turistët, e me pamjet e Velipojës nga 10 qershori 2020, ajo nuk ofrohej.
Gjatë ditëve të fushatës elektorale sivjet, kryeministri Rama por edhe kandidatët e tij për deputetë në Shkodër, e promovuan “4 vjeçari i Shkodrës” atë që pretendonte të merrte mazhoranca aktuale. Kjo, pasi pranohej “borxhi” ndaj Shkodrës në 8 vite, pasi “nuk ishte bërë sa duhej”. Natyrisht, siç ishte e parashikueshme, Shkodra nuk do të ndikohej. Madje, i dha PS- së një deputet më pak se para 4 viteve.
E mesa duket, premtimet u harruan dhe u rikthye kryefjala e kësaj qeverie ndaj Shkodrës, hakmarrja. Sepse nuk mund të quhet ndryshe ndërhyrja e pritshme në aksionin për ndërtimet pa leje. Sepse thuhet në të gjithë vendin, por një vit më parë Velipoja ishte e martirizuara e madhe. Sivjet, nuk ka asnjë indicie që mund të ndodhë ndryshe.
Ajo që pritet, është qasja e kandidatëve apo edhe deputetëve të zgjedhur me 25 prill në Shkodër, nga radhët e PS- së kuptohet. A do të jenë në krah të banorëve që përveç prishjes së ndërtimeve të mundshme pa leje, do tu shembet para syve edhe një sezon turistik, me humbje jo të papërfillshme financiare. Ndërtime pa leje ka në çdo cep të Shqipërisë, as kjo qeveri nuk arriti ti frenojë edhe pse bëri ligje të çuditshme si “15 vjet burg për ndërtim pa leje”. Por mesa duket, ose siç tregoi qershori i vitit 2020, në Shkodër, në Velipojë, janë me më shumë pa leje se në Jug.
E në fund, uroj dhe shpresoj të jem i gabuar në këto rreshta. Sepse janë shkruajtur bazuar në atë që ka ndodhur dhe jo në atë që pritet të ndodhë. /Nga Blerti DELIJA/