Lulzim Basha dhe mbështetësit e tij në selinë e PD- së e dinin se me 8 janar 2022, mbështetës të Berishës dhe votues të shkrkimit të tij, do të kërkonin të hapnin dyert e ndërtesës së tyre, bashkpronarë të të cilës ata janë. Për të penguar këtë, në selinë blu u punua intensivisht javën që po mbyllet sot duke përforcuar e blinduar të gjitha dyert. Sot u pa qartë se ndërtesa e PD- së ishte pajisur me superdyer metalike. Të paktën në katin e parë.
Policia e Shtetit, agjensitë ligjzbatuese e dinin se brenda selisë blu kishte individë që normalisht, nuk duhej të ndodheshin aty. Sot kjo u vertetua me zë dhe me figurë, në transmetim direkt nga mediat. E provuan vetë protestuesit me hunjtë kokës por edhe gazin lotsjellës që iu hidhej pikërisht nga këta individë.
Policia e Shtetit dhe specialsat e saj. me të drejtë ndërhynë kur nga brenda selisë iu bë kërkesë për ndihmë. Është detyra e policisë të mbrojë jetën e kërcënuar apo aluduar si të kërcënuar për çdo qytetar. Aq më tepër për 37 deputetë që paskan qenë brenda selisë së PD- së, siç delkaroi Gazment Bardhi. Po jeta e deputetëve të tjerë, jashtë selisë demokrate por edhe ata të zgjedhur nën siglën e PD- së, a nuk kishte të njëjtën vlerë me të deputetëve të ngujuar? A nuk ishte e turpshme që Sali Berishës, ish- kryeministër, ish- president i këtij vendi, ish- kryetar i asaj partie, ti hidhet në fytyrë gaz lotsjellës? Madje, në një moment kur ishte shumë larg PD- së dhe në rrugë të madhe!?
Sigurisht, siç kishin paralajmëruar, sot mund të jenë shkatërruar disa dyer e thyer disa xhama të selisë së PD- së. Janë veprime jo të bukura por të paralajmëruara. Janë reagim i disa qindra (nuk po them mijëra) demokratëve, atyre që kanë votuar PD- në e Lulzim Bashën si kryetar të saj. Ata po shkatërrojnë pronën e tyre, duke dëmtuar vetëm interesat e tyre si bashkëaksionerë të PD- së.
Ndërkohë sot, pati të goditur, të gjakosur. Ishin nga radhët e protestuesve, asnjë nga ata që ishin të ngujuar në selinë e PD- së. Policia dhe prokuroria e konsideruan “skenë krimi” selinë e PD- së. Por u pa qartë se krim nuk kryen vetëm ata që ishin jashtë selisë. Nga brenda selisë, ishin dhunuesit e vertetë, ata që gjakosën protestuesit demokratë. Mesa duket, policia është marrë vetëm me “kriminelët” jashtë jo me ata të vertetët brenda selisë. Ata nuk kursyen karrige e tavolina duke i hedhur mbi protestuesit poshtë, kush u’a autorizoi aqtyre brenda përdorimin mjeteve policore si gazi lotsjellës?!
Shumëkush mendon se sot Berisha dështoi. Ai nuk arriti të futet në selinë e PD- së për të nxjerrë Bashën nga aty. Të tjerë mendojnë se Basha fitoi, qëndroi stoikisht në katin e dytë të selisë pas dyerve të blinduara. Në fakt sot Basha mori një goditje të fortë, të paktën në sytë e demokratëve. Ishte prova ndoshta më evidente se Basha është pjesë e binomit me kryeministrin Rama. Gazi lotsjellës i hedhur sot nga brenda selisë por edhe nga policia, është o njëjtë me atë që u hidhej demokratëve në protesta që udhëhiqeshin nga Lulzim Basha në 2019- ën e të tjera.
Sot ishte një ditë e shemtuar për PD- në, demokracinë e Shqipërinë. Por ekziston mundësia të ketë produkte pozitive në vijim. Ndoshta mund të jetë shkas për reflektim, sidomos nga deputetët. A janë në anën e duhur, a janë në rresht me demokratët që i mbështetën e votuan? Reflektim si nga brenda selisë por edhe jashtë selisë. Mandati është i përkohshëm, grupi parlamentar, kryesia, Këshilli Kombëtar nuk zgjasin përjetë. Do të ketë sërish zgjedhje, gara elektorale. Demokratët e thjeshtë do të jenë sërish motori i tyre. Po si u trajtuan sot ata demokratë? Sepse deri tani akoma nuk kemi dëgjuar nga ana tjetër se ata që protestuan, nuk ishin demokratë. /Nga Blerti DELIJA/
