Është një ditë e zakonshme, këtej e andej 1990- ës por mund të shënjojë politikën shqiptare! 12 nëntor 2022! Është e shtuna kur opozita, ajo e bashkuar nën lidershipin PD- PL apo Berisha- Meta, do të përballet me “brinjën” e tretë të trekëndëshit më të suksesshëm politik të 32 viteve, Edi Ramën kryeministër.
Berisha, i zgjedhur dy herë president dhe po kaq herë kryeministër i vendit. Meta, president, kryetar Kuvendi dhe kryeministër. Rama, për herë të tretë i zgjedhur kryeministër, kryetar bashkie e ministër.
Berisha, kryetar i PD- së nga themelimi deri në 2013- ën “de facto”, pavarësisht emrave që e zëvendësuan. Meta kryetar “de facto” i LSI- së (sot PL) nga 2005- a. Edi Rama, në krye të PS- së po aq sa ai, prej mëse 17 vitesh. Sot, tre njerëzit më të fuqishëm të politikës shqiptare. Duke nxjerrë në harresë një tjetër, po aq të suksessheëm si Fatos Nano, i pakontestueshëm nga 1991 deri në 2005.
Sheshi do të jetë matësi i përballjes Berisha- Meta nga njëra anë dhe Rama nga ana tjetër. Prania në sheshe e mbështetësve të opozitës do të jetë sinjali i parë i rëndësishëm jo vetëm për Ramën por edhe qytetarët që qendrojnë të baraslarguar nga politika apo të painteresuar direkt për këtë pjesë shumë të rëndësishme të jetës sonë.
Berisha dhe Meta kanë detyrën jo të lehtë të tejmbushin sheshin para Kryeministrisë, siç nuk është mbushur asnjëherë nga qershori 2013- ë. Është një shesh mjaft i madh dhe që monitorohet lehtësisht. Jo vetëm nga dronët e mediave pranë qeverisë aktuale por edhe nga ata që konsiderohen ekspertë të monitorimit të tubimeve.
Nëse kjo dyshe ia del në këtë mision, është një sinjal shumë i rëndësishëm jo vetëm për Ramën por edhe qytetarët. Berisha- Meta kanë shumë faktorë në favorin e arritjes së synimit me numra. Situata e rëndë ekonomike, e përkeqësuar për shkak të rritjes galopante të çmimeve si pasojë e rritjes së çmimit të karburanteve, zbrazja e vendit nga banorët që grishen edhe nga mungesa e sigurisë për të sotmen e të nesermen, kanë ndikim të padiskutueshëm.
Nga ana tjetër, Rama duket e ka humbur atë rehatinë e zakonshme, duke shtuar ndjeshëm daljet në territor. Tashmë jo aq shumë dhe vetëm për të prerë shirita, por për të folur me shqiptarët, duke anatemuar opozitën, sidomos Berishën dhe Metën. Kjo e kthen përballjen gati në personale, një sfidë që duhet kaluar me çdo kusht e çmim.
Që nga 2013- a kur dorëzoi skeptrin e qeverisë dhe më pas edhe të partisë, 12 nëntori është sfida e parë e vertetë për Berishën. Për Metën, pas uljes nga “olimpi presidencial”, është po ashtu matja e parë e forcës reale. Ky skenar, duket se ka patur rrugëtime të ndryshme deri në finishin e 12 nëntorit. Berisha dhe Meta më shumë kanë shfrytëzuar Tiranën dhe studiot mediatike të kryeqytetit, ndërsa Rama më shumë “ka bredhur” drejt qytetarëve nëpër Shqipëri.
Ajo që mbetet të verifikohet, është suksesi apo dështimi që do të arrijnë palët. Akoma pa mbërritur 12 nëntori, e sigurtë është se njëra palë do të këndojë fitore mbi tjetrën dhe anasjelltas. Megjithatë, “minarja nuk futet në thes”, thotë populli. Sheshi para kryeministrisë do të jetë në sytë e të gjithë shqiptarëve, të angazhuar ose jo në politikën aktive. /Nga Blerti DELIJA/
