“Open Balkans zhduk Kosovën, Bosnjen dhe Malin e Zi”, presidenti malazez Gjukanoviç “plas bombën”…

“Open Balkans” si një projekt “shumë kontrovers”, është një skenar alternativ për të ardhmen e Ballkanit Perëndimor jashtë BE-së që ka si qëllim zhdukjen e Bosnjë-Hercegovinës, Malit të Zi, Kosovës dhe Maqedonisë së Veriut”. Këto deklarata të forta i ka bërë Presidenti i Malit të Zi, Milo Gjukanoviç në një intervistë për gazetën Vijesti. Ky qëndrim është tjetet interesant pasi shkon krejtësisht në kah të kundërt me atë të kryeministrit në largim Dritan Abazoviç, i cili e mbështet nismën Rama- Vuçiç.

Presidenti malazes ka dalë në mbështetje të zërave që e shohin Ballkanin e Hapur si një shantazh ndaj BE-së që nuk po i fut në gjitin e saj vendet e Ballkanit perendimor. Ai ka thënë se vendeve tona nuk i duhet një gjë e tillë: “Nuk mendoj se kemi nevojë për alternativë, kemi nevojë për anëtarësim. Prandaj mendoj se është krejtësisht e natyrshme që ne të vazhdojmë procesin e negociatave me BE-në me shpejtësi të plotë” tha ai pak javë më parë pas një takimi me presidentin gjerman, Frank-Walter Steinmeier.


Ndërsa këtë të mërkurë për Vijesti ai deklaroi: “Ne nuk kemi nevojë për këtë, ne kemi nevojë për anëtarësim në BE. Ata që nuk e shohin rajonin tonë në Evropë, nuk e shohin as demokracinë multietnike në Ballkan. Atyre u pëlqen ideja e ndryshimit të kufijve, homogjenizimi etnik dhe fetar brenda shteteve të zgjeruara. Si zakonisht, gjithçka fillon tradicionalisht nga pala serbe”, tha Gjukanoviç.

Presidenti malazes theksoi se qëllimi i autorëve të idesë së Ballkanit të Hapur është zhdukja e Bosnjë-Hercegovinës, Malit të Zi, Kosovës dhe Maqedonisë së Veriut dhe shtoi se sigurisht që nëse ky skenar vihet në jetë, ai do të përfundonte me “luftë dhe gjenocid”.

Të njëjtin pozicion Gjukanoviç mbajti edhe gjatë një vizite në Kosovë së bashku me presidenten Vjosa Osmani. Presidentja e Kosovës dhe ai i Malit të Zi, mbajtën qëndrimin se bashkëpunimi rajonal duhet promovuar përmes Procesit të Berlinit.

Por atyre iu përgjigj në mënyrë të rrufeshme, nga Tirana Edi Rama: “Kushdo është kundër Ballkanit të Hapur është në të drejtën e vet që as mos të shohë, as mos të dëgjojë dhe as mos të kuptojë se kjo nisëm nxit paqen, bashkëpunimin, integrimin dhe e përshpejton Procesin e Berlinit! Ballkani i Hapur nuk do të ndalet sepse e ardhmja nuk ndalet dot”, tha në mes të muajit maj Rama.