Së bashku me ndryshimet në drejtimin e dy ministrive, kryeministri Edi Rama ka firmosur sot dhe disa ndryshime në nivelin e zv.ministrave.
Kreu i qeverisë ka firmosur sot largimin e një prej bashkëpunëtorëve të tij të vjetër nga posti i zv. ministrit të Infrastrukturës dhe Energjisë, Artan Shkreli. Shkreli në të paktën dy raste, në mars 2019 dhe maj 2020, ka kritikuar në rrjete sociale kryebashkiakun Veliaj dhe ministren Margariti. Këto postime në fakt, u fshinë brenda pak minutave, në rastin e Veliajt madje Shkreli tha se i vodhën Facebook- un.
Në vend të Shkrelit, është emëruar Gjergji Simaku, duke e lënë sërish këtë ministri me katër zv.ministra.
Ndërkohë, po sot është firmosur dhe për largimin e Sokol Dedja nga posti i zëvendësministrit për Evropën dhe Punët e Jashtme, duke e lënë këtë dikaster aktualisht me vetëm një zv.ministër.
Rama nuk ka emëruar zëvendësues për të, por ka emëruar një tjetër zv. ministër të Brendshëm, ku bashkë me Andi Mahilan, ky dikaster bëhet me katër zv. ministra.
