Kandidati i Partisë Socialiste për Bashkinë e Shkodrës, Benet Beci është shprehur se kandidati i koalicionit “Bashkë Fitojmë” dhe njëherësh kryebashkiaku i Shkodrës, Bardh Spahia nuk ka bërë asgjë për këtë bashki, teksa ka shtuar se sipas tij kundërshtarit të tij i mungon eksperienca e duhur dhe nuk ka mekanizma dhe strategji për të bërë diçka për kryeqendrën e veriut.
Benet Beci: Ai është djalë dhe familje e mirë. Problemi që ka është se nuk e ka mekanizmin e punës ose gjatë kësaj kohe nuk ka bërë asgjë. Nuk ka një mekanizëm që të prodhojë punë e strategji për qytetin. I mungon eksperienca që të bëjë diçka.
Mirela Milori: Mendoni se kryetar bashkie duhety të jetë dikush që menaxhon mirë e që është administrator i mirë?
Benet Beci: Kjo është e domosdoshme për arsye se kjo nuk është një lojë politike. Kjo varet dhe nga strategjia që ka. Në rastin e Shkodrës do të duhet të kemi prova për të punuar dhe provat vijnë ose me CV-në, ose me ato që ke realizuar dhe ato që ke në plan të bësh. Shumë e rëndësishme është Shkodra dhe kush i prodhon Shkodrës diçka që bëhet. Unë do të kisha hapur rrugën kujtdo për një gjë që po, ta bëjë dikush më mirë. Nëse do të kishim pasur një propozim që e bën Shkodrën, jam dakord, por ne nuk kemi një propozim që e bën Shkodrën.
Kandidati i Partisë Socialiste për Bashkinë e Shkodrës, Benet Beci ka thënë se projekti më i mirë i qeverisë Berisha ka qenë ai i rrugëve rurale.
I ftuar në “Milori Live” në Klan News, kandidati për Shkodrën i PS-së, Beci shton se nuk ka qenë asnjëherë më parë i përfshirë në politikë derisa është zgjedhur deputet i Partisë Socialiste, mandat të cilin e la për të kandiduar për Shkodrën.
Mirela Milori: Keni dhe disa të majtë kundërshtarë që mund të thonë “ka bashkëpunuar me Berishën” ky njeri dikur, tani këto 8 vitet e fundit bashkëpunoi me ne”. Të djathtët thonë “këto 8 vitet e fundit është me të majtët”. Si e menaxhoni ju këtë?
Benet Beci: Unë nuk kam qenë asnjëherë në politikë, as në kohën kur kam bashkëpunuar me ish-kryeministrin Berisha e derisa të shkoja në Parlament. Kam qenë drejtor i Fondit Shqiptar të Zhvillimit apo i KESH-it, jo anëtar partie dhe nuk jam as sot. Nuk kam qenë kurrë. Arsyeja pse është menduar me një lloj asocimi politik ka qenë se gjatë qeverisë së ish-kryeministrit Berisha, projekti më i mirë dhe ndoshta më i suksesshmi i asaj qeverie ka qenë projekti i rrugëve rurale, i bërë me donatorët që unë kam qenë drejtori i fondit. Ishte produkti më i mirë që Qeveria Berisha prodhoi nga programi. Po kështu edhe gjatë qeverisjes së qeverisë Rama, Fondi Shqiptar i Zhvillimit me donatorët arriti të bëjë disa nga projektet zhvillimore të jashtëzakonshme në qytete.
