Komisioneri Shtetëror i Zgjedhjeve, Ilirjan Celibashi i është përgjigjur shqetësimit të Presidentit, Ilir Meta, i cili një ditë më parë foli për skenare të manipulimit të votave në njësinë 10, ku do të eksperimentohet numërimi elektronik.
Celibashi tha se nuk komenton deklaratat politike, por garantoi se nuk ka asnjë shans për manipulim votash, pasi procesi është 100 % i sigurt dhe do të tregoj 100% vullnetin e qytetarëve.
“Ajo që mund të them me siguri në lidhje me procesin zgjedhor që do zhvillohet në njësinë 10 ku do votohet nëpërmjet elektronikes, procesi është 100% i sigurt dhe nuk ka shans që edhe dikush tjetër në mënyrë jo institucionale të manipulojë atë proces. Procedurat e votimit janë 100% të sigurta, siguria dhe integriteti i votës është i sigurt dhe rezultati do të reflektojë 100% vullnetin e zgjedhësve.
Në tërësi edhe në aspektin organizativ të zhvillimit të zgjedhjeve, ashtu sikurse edhe njësitë e tjera zgjedhore, ofron gjithë procesi i përgatitur siguri të plotë për mos cënim të integritetit të votës”, tha Celibashi.
Çfare tha nje dite me parë Meta
“Unë i ftoj qytetarët e Vlorës që të jenë të qetë, të mos intimidohen nga askush, të denoncojnë në portalin e Institucionit të Presidentit të Republikës siç kanë ardhur shumë denoncime, pjesë e këtij skenari që sqarova, siç ka edhe skenarë të tjera, të Durrësit, të Elbasanit, me emra, me mbiemra, me të dhëna, siç ka edhe një skenar me ndërhyrje në Njësinë 10 me votimin elektronik që do të eksperimentohet dhe do të jetë numërimi i parë në Tiranë.”
