Partia Demokratike, ajo që mund të konsiderohet në kushtet aktuale si PD- ja zyrtare, ka reaguar në lidhje me kandidatët e shpallur nga Sali Berisha për zgjedhjet e pjesshme lokale të 6 marsit. Në një reagim zyrtar, PD thotë se emrat e shpallur nga Berisha nuk janë kandidatë të kësaj force politike.
Në reagim thuhet se Berisha po përpiqet të dëmtojë PD për interesat e tij personale duke mashtruar demokratët, të cilët ende nuk e kanë kuptuar hallin e tij.
“Partia Demokratike njofton gjithë simpatizantët dhe votuesit e saj se emrat e shpallur sot nga grupimi i Sali Non-Grates, nuk janë kandidatë të PD.
Me farsën e radhës, Berisha po përpiqet të dëmtojë PD për interesat e tij personale.
Berisha mund të përdorë çdo njeri për hallin e non gratës së tij, por as ai, dhe as ata nuk kanë më asnjë lidhje me Partinë Demokratike.
Ky është përdorimi dhe mashtrimi i radhës që Sali Berisha u bën edhe atyre pak demokratëve që nuk e kanë kuptuar akoma hallin e tij.
