“Nuk jam në Shqipëri për të negociuar zgjidhjen e krizës politike”. Kështu ka deklaruar sot Zëvendës Ndihmës Sekretari i Shtetit për Evropën Matthew Palmer, gjatë takimit të bërë paraditen e sotme me gazetarë.
Duke komentuar situatën politike në vend, Palmer ka inkurajuar të gjitha partitë politike të marrin pjesë në zgjedhjet e qershorit.
“Nuk është zgjidhje djegia e mandateve nga opozita, duhet të gjej një mënyrë për të marr pjesë në zgjedhje. Do të ishte fatkeqësi nëse opozita nuk do të merrte pjesë në këtë proces demokratik”- ka thënë ai.
I pyetur për influencën ruse në rajon, Palmer ka deklaruar se “Amerika kërkon transparencë dhe bashkëpunim mes vendeve, ndërsa Rusia kërkon kaos. Ne duam që rajoni të ketë të ardhme. Shqipëria është target i vështirë për Rusinë”.
Sa për cështjen e lobimit të PD, Palmer nuk ka pranuar të bëjë komente, duke thënë shkurt se ajo është në hetim e për këtë nuk mund të japë detaje.
Interesit të medias për ambasadorin e ri të SHBA në Shqipëri, Palmer nuk i ka dhënë një emër, duke thënë se “Shpresoj që së shpejti të kemi një emër”.
Jashtë vëmendjes nuk ka mbetur as cështja e dialogut Kosovë-Serbi dhe ajo e kufijve. “Ne mbështesim një marrëveshje mes dy vendeve, duhet ta njohin njëra-tjetrin. Çështja e kufijve nuk është në qendër të kesaj marrëveshje”- ka thënë zyrtari i lartë amerikan.
