Deputetja Rundina Hajdari propozon një tryezë politike për të zgjidhur ngërçin aktual pas vendimit të opozitës për të dorëzuar mandatet. Deputetja Hajdari vetëofrohet për të bërë rolin e ndërmjetëses dhe për të ulur palët politike në një tryezë.
“Mendoj që Kuvendi i Shqipërisë është institucioni që përfaqëson popullin dhe është mënyra e duhur për ta bërë.
“Po sigurisht që do ketë edhe një vend për mua, sepse unë po i ftoj ata të ulen për dialog. Ata nuk duan të ulen, unë po i ftoj”, tha Rudina Hajdari në studion e “Open”.
E pyetur nëse ka caktuar një datë, ajo tha se “varet nga ta”, ndërsa shtoi se është munduar të mbajë një qëndrim mbi partiak dhe “arsye pse e kam vendosur të mbaj këtë qëndrim, është se nuk dua të dëmtoj Partinë Demokratike dhe as nuk dua ta çoj vendin në një përshkallëzim dhune dhe do të propozoja që të kishim këtë tryezë”.
Rudina Hajdari bëri një koment edhe në lidhje me ish-liderin historik të Partisë Demokratike. Pasi i risollën në vëmendje një deklaratë të ish-udhëheqësit të Partisë Demokratike, Sali Berisha, i cili nga e njëjta studio emisioni e kishte quajtur Rudina Hajdarin “e bija e babait”, teksa shtonte se ashtu si Azem Hajdari nuk ishte gjithmonë mbështetës i tij, edhe e bija fliste hapur dhe e pavarur nga askush, Rudina e quajti një kompliment.
“E kam thënë edhe më herët, është një kompliment për mua dhe unë do të vazhdoj të qëndroj me të njëjtën sjellje politike. Sali Berisha është një figurë simbolike e PD-së, por kam marrë gjërat më të mira prej tij, duke mos komunikuar shpesh me të kohët e fundit”, tha Rudina Hajdari.
Ajo u ndal edhe tek zërat nëse po përgatitet për një parti të re, duke theksuar se nuk është momenti për këtë gjë.
“Nuk besoj se është momenti për këtë gjë. Unë besoj se është koha e duhur për të bërë disa reforma të rëndësishme, si ajo e Kodit Zgjedhor, që do të sjellë shumë ndryshime, e ndoshta edhe ndryshim të sistemit politik. Ajo që dua unë të shoh është të kemi një tryezë që përfshin të gjithë faktorët politik, që të flasë për një reformë të thellë qoftë për partitë politike, ashtu dhe për Kodin Zgjedhor”, tha më tej Hajdari.
