“Nuk do e hidhni kollaj me zullumet që keni bërë”, u shkarkua nga detyra në RTSH, Jetmir Shpuza fiton gjyqin…

Jetmir Shpuza ka fituar përballjen në shkallën e parë me RTSH- në për shkarkimin nga detyra e Drejtor i Transmetimeve Lokale. Vendimi është marrë sot nga Gjykata e Tiranës, pas shqyrtimit të ankimimit të bërë nga Shpuza.

Lajmin e ka dhënë vetë gazetari i njohur, përmes një publikimi në rrjetet sociale. Me këtë rast, ai përcjell edhe një mesazh më të rëndësihëm, kur shprehet pa përmendur emra, por në drejtim të njohur publikisht se “Nuk do e hidhni kollaj me zullumet që keni bërë”.

PUBLIKIMI NË FACEBOOK I JETMIR SHPUZA

Sot Gjykata e Tiranës dha vendimin duke e quajtur të padrejtë dhe të pajustifikuar largimin tim nga RTSH, që në rastin e parë nga Drejtor i Transmetimeve Lokale pa shkak, pa arsyetim, pa patur asnjë vërejtje për punën time. Në këtë rast penalizohet RTSH-ja si institucion, pavarësisht se vendimi është firmosur nga një person që tashmë nuk ndodhet në RTSH.

Desha të falënderoj gjithë ata kolegë të sektorëve të ndryshëm, qoftë të qendrave vendore audiovizive apo njësive dhe drejtorive të tjera që nuk kishin të bënin direkt me punën time,për mbështetjen morale që më kanë dhënë këta muaj pas largimit nga ai institucion. Beteja ime mediatike dhe ligjore me ata që ndërmorën këtë akt ndaj meje dhe disa kolegëve të tjerë tani fillon. Kjo ishte fitorja e parë. Nuk do e hidhni kollaj me zullumet që keni bërë.