Sandër Lleshi është akoma me të gjitha efektet gjeneral brigade. Lleshi ka fituar gjyqin për tu rilthyer në detyrë, në të njëjtin post dhe me të gjitha privilegjet, edhe ato financiare. Përmes një letre të mbyllur për presidentin por që Lleshit iu kthye në “letër të hapur” nga kryeministri Rama, gjenerali i brigadës bën një terheqje totale nga të drejtat e tij. E gjithë kjo, për një post të përkohshëm ministri, në jetë civile dhe me mijëra akuza që do ti hidhen përsipër. Për një ushtarak karriere, për një gjeneral që ka patur mjaft vlerësime, kjo lloj tërheqje nuk tingëllon aspak dinjitoze. Megjithatë, asnjëherë nuk është vonë për tu penduar, qoftë edhe në moshën që ka Lleshi.
Sot Sandër Lleshi pranoi që Meta ka patur të drejtë që nuk e ka dekretuar. Përndryshe nuk kishte pse të dërgonte një letër në drejtim të Metës dhe Xhaçkës për të hequr dorë publikisht nga të drejtat që burojnë si fitues i gjyqit me ish- presidentin Nishani. Pra, Lleshi nuk do të jetë më gjeneral brigade dhe rrjedhimisht nuk do të marrë përfitimet edhe financiare. Por a bëhet i dekretueshëm nga Meta me heqjen dorë nga vendimi i gjykatës së Apelit Sandër Lleshi?
Parimet e jurisprudencës thonë se një vendim gjykate mund të çvlerësohet apo rrëzohet vetëm nga një gjykatë më lartë. Pra, pavarësisht heqjes dorë nga vetë Lleshi, vendimi i gjykatës që e kthen në detyrë dhe i jep të drejtat e postit, mbetet në fuqi. Maksimumi që mund të bëjë Lleshi, ëhtë të heqë dorë nga marrja e rrogës. Deklarata e vetë Lleshit nuk ka snjë vlerë juridike për të mundësuar dekretimin e tij si ministër. Madje, situata e tij është tragji- komike. Nishani ka nxjerrë një dekret që e liron nga detyra në Forcat e Armatosura, Gjykata ka marrë një vendim për rrëzimin e dekretit dhe rikthimin e Lleshit në detyrë, ndërsa kjo nuk ka ndodhur.
Nga ana tjetër, nuk ka një dekret presidencial për ta kthyer në punë Lleshit pas vendimit të gjykatës që të justifikohet një dekret tani i Metës për ta nxjerrë në lirim. Duket pak e ngatërruar si çështje, por juridikisht nuk ka zgjidhje për momentin. Nëse Meta e dekreton ministër duke pranuar vetëm vetëdeklarimin e Lleshit që heq dorë nga pozitat e rifituara me vendim gjykate, opozita ka të gjitha të drejtat ta atakojë në Gjykatë Kushtetuese, nëse ajo mund të gjykojë çeshtjen në kushtet që është aktualisht.
Në këto kushte, presidenti Meta mund të marrë cilin vendim të gjykojë të asryeshëm, edhe pse ligjërisht, me dëshirën e vetë Lleshit, vetëm një gjykatë më lartë duhej të rrëzonte vendimin e Apelit për ti hapur rrugë ligjshmërisë në dekretimin presidencial si ministër. Por presidenti mund të vendosë të gjykojë edhe politikisht, sepse në kushtet aktuale, juridikisht vështirë që dikush të japë një alternativë si mund të veprohet. /Shënim i ShkodraWeb/
