Departamenti amerikan i Drejtësisë ka zyrtarizuar hetimin për të parë nëse agjentët e FBI-së kanë përgjuar fushatën presidenciale të Donald Trumpit në vitin 2016 për qëllime të papërshtatshme.
Nisja e hetimeve është mbështetur dhe nga Presidenti Donald Trump, i cili ka thënë se do të kuptojë nëse administrata paraardhëse ka urdhëruar vërtet ndonjë lëvizje të tillë apo jo.
Zëvendësprokurori i Përgjithshëm, Rod Rosenstein deklaroi se, nëse zbulohet ndonjë lloj infiltrimi do të merren masa për të gjithë ata që kanë bërë shkelje, shkruajnë mediat e huaja.
Hetimi i ri vjen paralelisht me atë ekzistues mbi lidhjet e drejtuesve të fushatës së Trumpit me rusët dhe mundësinë që Moska të ketë ndikuar rezultatin.
Kërkesa e fundit e shefit të Shtëpisë së Bardhë vjen në mesin e një serie mesazhesh në “Twitter” të dielën, ku denoncohej ajo që ai e quante “një gjueti shtrigash”, e që sipas Trumpit nuk ka gjetur asnjë afrim të stafit të tij të fushatës me Rusinë.
Sa për akuzat drejtuar FBI-së, ato presidenti i lëshoi të premten, kur tha se Byroja kishte dërguar një ekip të sajin për të spiunuar fushatën e tij.
“New York Times” e ndoqi çështjen përmes një artikulli dhe tregoi se ka pasur vërtet një informator, identiteti i të cilit nuk bëhet i ditur, por thotë se ai ishte dërguar të fliste me njerëz pranë Trumpit, vetëm pas raporteve për kontakte të dyshimta me Moskën.